Suriya sobiq prezidenti Bashar Asad boshqaruvi davrida maxsus xizmatlar taxminan sakkiz million kishini kuzatgan, qidirgan yoki ular haqida ma’lumot to‘plagan. Bu haqda mamlakat Ichki ishlar vazirligiga tayanib Deutche Welle xabar berdi.
Bu Suriya xalqining deyarli uchdan bir qismini tashkil etadi. Maxsus xizmatlar va boshqa idoralar ularning har biri haqida ma’lumot to‘plagan, deydi vazirlik vakili.
Uning so‘zlariga ko‘ra, sakkiz milliondan ortiq odam siyosiy sabablarga ko‘ra maxsus xizmatlar e’tiboriga tushgan. Bu asosan norozilik namoyishlari ishtirokchilari va rejim muxoliflariga taalluqli hisoblanadi. Ular ko‘pincha “terrorizm”da ayblangan, hibsga olingan, qamoqqa tashlangan yoki kuzatuv ostiga olingan.
Suriya hukumati vakili ta’kidlashicha, ko‘pchilik odamlar maxsus xizmatlar nazoratiga tushganini faqat nazorat-o‘tkazish punktlarida to‘xtatilganda yoki mamlakatdan chiqib ketishga uringanda bilgan.
Asad rejimining ag‘darilishi
2024-yil oxirida Suriyadagi “Hay’at Tahrir ash-Shom” guruhi boshchiligidagi qurolli kuchlar mamlakatning yirik shaharlarini, jumladan poytaxt Damashqni egallab, prezident Bashar Asad rejimini ag‘darishga erishdi. U va otasi Suriyani ellik yildan ortiq boshqargan edi. Asad oilasi bilan Rossiyaga qochib ketdi.
“Hay’at Tahrir ash-Shom”ning sobiq rahbari Ahmad ash-Shar’a Suriyaning yangi prezidenti ettib tayinlandi. U G‘arb mamlakatlari bilan munosabatlarni yaxshilashni boshlamoqchi ekanini bildirdi. AQSH va Yevropa Ittifoqi may oyida “mamlakatlardagi siyosiy o‘zgarishlarni qo‘llab-quvvatlash maqsadida” Suriyaga qarshi sanksiyalarning bir qismini bekor qila boshladi.
Izoh (0)