Turkiya Suriyaning markaziy qismida harbiy bazaga ega bo‘lishni xohlaydi. Bu haqda AQSH davlat kotibi, prezidentning milliy xavfsizlik bo‘yicha yordamchisi vazifasini vaqtincha bajaruvchi Marko Rubio ma’lum qildi.
U AQSH Senatining tashqi ishlar qo‘mitasi yig‘ilishida shunday bayonot berdi. Rubio Isroil rahbariyati Turkiyaning Suriyada “mavjudligi”dan xavotirda ekanini aytdi.
Menimcha, asosiy omillardan biri Suriya hududidagi chet el harbiy bazalari masalasi bo‘ladi. O‘tish davri hukumati ma’lum bir bosqichda chet el harbiy bazalarini joylashtirishga ruxsat berish yoki bermaslik to‘g‘risida qaror qabul qilishi kerak bo‘ladi. Bu Rossiyaga taalluqli, ammo Turkiyaga ham tegishli bo‘lishi mumkin, chunki u ham, mamlakatning markaziy qismida bazasi bo‘lishini xohlaydi, dedi Rubio.
Shu bilan birga, u Suriyadagi vaziyat hozir barqaror ekani va o‘tish davri hukumati uni “inqilob yoki Isroilga qarshi hujumlar uchun maydon” sifatida ko‘rmayotganini aytdi.
Isroil Turkiyaning Suriyada harbiy bazasi bo‘lishiga qarshi
8-aprel kuni Isroil bosh vaziri Binyamin Netanyaxu Suriyada Turkiya harbiy bazalarining bo‘lishiga qarshi chiqishini aytgandi. U, shuningdek, Turkiya va Isroil o‘rtasidagi ziddiyatlarni hal etishda AQSH prezidenti Donald Tramp vositachilik qilishi mumkinligini istisno etmagan.
9-aprel kuni Turkiya tashqi ishlar vaziri Hoqon Fidan uning mamlakati Suriyada, jumladan, Isroil bilan ham, hech qanday to‘qnashuvga kirishmoqchi emasligini aytgan. Shu bilan birga, u Isroilning Suriyadagi harakatlarini qoralab, yahudiy davlati u yerdagi turli harbiy nishonlarga doimiy hujumlar uyushtirishini tanqid qilgan. Vazir Turkiya Suriyaning yangi hokimiyati bilan xavfsizlik kabi bir qancha masalalarda hamkorlik qilayotganini bildirgan.
Izoh (0)