Rossiyalik muxolifatchi marhum Aleksey Navalniyning sobiq advokati Olga Mixaylova “Meduza”ga bergan intervyusida Navalniy qamoqxonada zaharlanishi mumkinligidan xavotirda bo‘lganini ma’lum qildi.
“Men paranoyak (psixologik buzilish turi) bo‘lib ko‘rinishdan qo‘rqaman, lekin bu yerda meni zaharlashayotganga o‘xshaydi, degan edi Navalniy. Koloniyani tark etishim bilan men bu haqda darhol Kobzevning X da yozdim, bu bizning advokatimizning X sahifasi edi, — dedi Mixaylova intervyuda.
Mixaylova Rossiya bosh prokurori, Federal Jazoni ijro etish xizmati direktori va Rossiyadagi Inson huquqlari bo‘yicha vakil Tatyana Moskalkovaga mazkur masala yuzasidan shikoyat bilan murojaat qilgan.
Mixaylovaning ta’kidlashicha, Navalniyning o‘limi arafasida, 15-fevral kuni Moskvaning Basmanniy sudi unga nisbatan qamoqqa olish tarzidagi sirtdan ehtiyot chorasini tayinlagan. Sud protokoliga ko‘ra, asos sifatida Mixaylova va Navalniy o‘rtasidagi suhbat tinglangan bo‘lib, unda siyosatchi zaharlanishdan xavotirdaligini aytgan.
Sudya Dudar esa men uchun ehtiyot chorasini tanlash zarurligining yagona dalili sifatida ushbu bayonnomadan foydalangan. Qolaversa, koloniyaga borganimizda u yerdan olib kelgan va olib chiqqan barcha qog‘ozlarimiz suratga olingan, — deya ta’kidlagan Mixaylova.
Hozirda advokat ekstremistik jamiyatda ishtirok etganlikda ayblanmoqda (RFJK 282.1-moddasi 2-qismi). Ayni paytda Mixaylova Rossiyadan tashqarida.
Navalniyning uch advokati – Vadim Kobzev, Aleksey Liptser va Igor Sergunin o‘tgan yilning oktyabr oyida ekstremistik jamiyatda ishtirok etganlikda ayblanib, hibsga olingan edi. Himoyachilarni hibsga olish muddati bir necha bor uzaytirilgan. Rosfinmonitoring advokatlarni “ekstremistlar va terrorchilar” ro‘yxatiga kiritgan.
Tergov ma’lumotlariga ko‘ra, Kobzev, Liptser va Sergunin muntazam ravishda Navalniyning koloniyadan kelgan maktublarini uning sheriklariga yetkazib turgan - shu tariqa mahkum muxolifatchi “ekstremistik jamiyat rahbari va yetakchisi sifatida xizmat qilishda davom etgan”. Navalniy o‘z himoyachilarining hibsga olinishini “qo‘pol ravishda qonunbuzarlik” deb atagan.
Avvalroq Bellingcat loyihasi tergovchisi Xristo Grozev jurnalist Mixail Zigar bilan suhbatda Navalniy zaharlangan bo‘lishi mumkinligini aytgan edi.
Navalniy 16-fevral kuni Yamal-Nenetsk avtonom okrugidagi 3-sonli axloq tuzatish koloniyasida vafot etgan edi. Jazoni ijro etish federal xizmati siyosatchining o‘limiga tromblarning to‘satdan yorilishi sabab bo‘lganini davo qilgan. Muxolifatchining hamrohlari Navalniyning o‘limini qotillik deb atab, uning ortida Rossiya rasmiylari turganini aytgan.
Rasmiylar Navalniyning jasadini onasi Lyudmila Navalnayaga bir haftadan ko‘proq vaqt davomida berishdan bosh tortib, undan ommaviy dafn marosimini o‘tkazmaslikni talab qilgan. 1-mart kuni muxolifning dafn marosimi Moskvadagi Borisovskiy qabristonida bo‘lib o‘tgan.
Izoh (0)