Yosh sehrgarlar maktabi va u yerdagi o‘quvchilarning sarguzashtlari haqidagi filmni ko‘rmagan yoki u haqda eshitmagan insonni topish qiyin. “Garri Potter” franshizasi bolalar va kattalar birdek miriqib tomosha qiladigan asarlardan biridir. Mazkur fantastik filmni yaratish uchun tasvirga olish jamoasi juda ko‘p ter to‘kkan. Bu safargi hikoyamiz franshizaning birinchi qismiga oid qiziqarli faktlar va suratlar haqida bo‘ladi.
“Garri Potter va hikmatlar toshi”da professor Dambldor rolini o‘ynagan Richard Xarris ancha keksa bo‘lgan va xotirasi unga pand bergan. U o‘z so‘zlarini ko‘pincha esidan chiqarib qo‘ygan. Uni xafa qilmaslik uchun Garri Potter qahramoni aktyori Deniel Redklif Richarddan dialoglarini mashq qilishda yordam berishini so‘ragan. Mehribon bola aslida doim nutqini yoddan bilgan, shunchaki keksa hamkasbi so‘zlarini eslashga va takrorlashga shu tarzda ko‘maklashgan.
Tom Felton ijodiy jamoadagi bolalar orasidan eng katta yoshli bola edi. U Rupertdan bir yosh, Denieldan ikki yosh va Emmadan uch yosh katta edi. Emmma Uotson o‘sha vaqtda Tomni yoqtirib qolgan, chunki Felton kelishgan, aqlli bola edi va skeytbordda ucha olardi. Ammo Tom Emmaga o‘z singlisidek munosabatda bo‘lgan. Hozirda ular yaqin do‘stdir.
“Garri Potter” asari bestseller kitoblardan bo‘lganiga qaramay, kinostudiya rahbarlari filmning muvaffaqiyatsiz chiqishidan va yosh aktyorlarning tezda ulg‘ayishidan qo‘rqqan. Shu sababli asar muallifi Roulingga studiya ikkita taklif kiritgan: asar asosida yoki bir nechta animatsion filmlar yo barcha kitoblarni birlashtirgan bitta film suratga olinadi. Ammo Rouling buni hatto muhokama qilishni istamadi va studiyaga uning kitoblaridan bu tarzda foydalanishni taqiqladi. Natijada “Garri Potter va hikmatlar toshi” filmini suratga olish kelishildi.
Miriam Margolis birinchi marta filmda Pomona Spraut obrazini gavdalantirgan. U kichik rol o‘ynaganiga qaramay, muxlislar aktrisani hanuz yaxshi eslaydi va ba’zilar hatto uni to‘y va tadbirlarga Pomona obrazida kelishini iltimos qilib turadi. Bunday takliflarga javoban aktrisa Margolis salbiy munosabat bildirgan va ancha yillar avval ulg‘ayib bo‘lgan, lekin hali ham sehrgarlar olami haqida unutmagan bunday Yoshi katta muxlislarni kamolotga yetmagan insonlar deb atagan. Shundan so‘ng, Lavanda Braun rolini o‘ynagan Jessi Keyv unga qarshi chiqqan va barcha insonlar qalban bola ekanligini, Miriam esa qarib qolgani uchun nimalar deganini tushunmasligini aytib o‘tgan.
Filmdagi kutubxonaning taqiqlangan bo‘limi haqiqiy Oksford kutubxonasida suratga olingan, kitoblarning ba’zilariga esa yuzlab yildan oshgan. Qadimgi kitoblarning iloji boricha uzoq vaqt xizmat qilishini ta’minlash uchun Bodlean kutubxonasida olov yoqish qat’iyan man etiladi. Ammo Garri Potter jamoasi uchun bu qoida istisno qilingan. Deniel Redkliff qo‘lidagi shamchiroq bilan mazkur qadimiy kutubxona bo‘ylab yurgan yagona bola va ehtimol, yagona odamdir.
“Garri Potter” filmlarini tasvirga olish maydonidan olingan fotosuratlarda aktrisa Meggi Smitning deyarli hech qachon tabassum qilmaganining guvohi bo‘lishimiz mumkin. Bir qarashda, u har doim qattiqqo‘l o‘qituvchi qiyofasida qolgandek tuyuladi, lekin aslida Meggi Garri Potter haqidagi filmda ishlashni unchalik yoqtirmasdi. Birinchi ikkita filmning rejissyori Kris Kolambus Smitni suratga olish uchun soatlab kutishga majbur qilgan va uning navbati kelganida Deniel Redkliffni uning ortidan jo‘natib yuborgan, chunki g‘azab otiga mingan ayol yosh bolani urushmasligini bilgan.
Yirik filmlarni suratga olish nizomiga ko‘ra, yosh bola aktyorlar film uchun maktabdagi o‘qishni tashlab qo‘ymasliklari va darslar uchun vaqt ajratishlari shart. Suratga olish soatlari orasida ularga tanaffus beriladi va bolalar suratga olish maydonida maxsus o‘qituvchilardan saboq oladi. Xogvartsning asosiy zalida o‘tirgan yosh aktyorlar o‘zlarini nimanidir o‘qiyotgandek ko‘rsatmagan, balki haqiqatda ta’lim olgan.
Garri Potter obrazini ijro etish uchun aktyorni topish butun kasting jarayonining eng qiyin qismi bo‘lgan. Boshqa rollar uchun deyarli barcha aktyorlar allaqachon tanlangan vaqtda Garriga da’vogarlik qiladigan bola topilmagan. So‘ng Deniel yosh Devid rolini o‘ynagan “Devid Kopperfild” filmini tasodifan tomosha qilganida rejissyor Kris Kolumb shu zahotiyoq o‘zlariga kerak bo‘lgan aktyor kim ekanligini anglab yetgan. Avvaliga Redkliffning ota-onasi bunga rozi bo‘lmagan, ularni ko‘ndirishga rejissyor uzoq vaqt uringan va oxir-oqibat masala ijobiy hal qilingan.
Franshizani suratga olish Gollivudda o‘tkazilishi rejalashtirilgan edi. Ammo Denielning ota-onasi o‘g‘lini boshqa davlatga qo‘yib yubormaganligi va deyarli faqat inglizlardan iborat aktyorlarning transport xarajatlarini kamaytirish uchun suratga olish ishlari Angliyaga ko‘chirilgan.
Kenterberi sobori, Gloster sobori, Bodlian kutubxonasi, London hayvonot bog‘i, Kings Kross stansiyasi va boshqa ko‘plab joylarning barchasi “Garri Potter”dagi ajoyib muhitni yaratishga o‘z hissasini qo‘shgan.
Garri Potterning onasi Lili “Hikmatlar toshi” qismida bir necha daqiqaga paydo bo‘ladi. Avval ushbu rol muallif Joan Roulingga taklif qilindi, lekin u aktyorlik mahoratining yetishmasligi bilan barcha ishni barbod qilishini ta’kidlab, taklifni rad etdi. Qolaversa, Lili obrazi filmda ko‘plab voqealarni ochib berishga xizmat qiladigan markaziy qahramonlardan biri edi.
Xogvarts maktabidagi katta zal dastlab boshqacha ko‘rinishda bo‘lgan. Dizayner Styuart Kreyg pollarni york toshi bilan qoplash uchun juda ko‘p pul sarflagan. Bu ishi uchun dizayner va rejissyorni ko‘pchilik tanqid qilgan, lekin oxir-oqibat u barchasini to‘g‘ri qilgani ma’lum bo‘ldi. Franshizaning barcha qismi aynan shu yerda suratga olindi va bino uzoq vaqtga xizmat qildi.
Izoh (0)