Qashqadaryo viloyatining Nishon tumanida faoliyat yurituvchi fermer MIBning Nishon tuman bo‘limi haydov traktorini noqonuniy 49 kun ushlab turgani uchun byurodan 355 million so‘m zararini qoplatishga urinib, sudga bergandi. Dastlabki instansiya sudlaridan Qarshi tumanlararo iqtisodiy sudi 2024-yil 5-fevraldagi hal qiluv qarori bilan fermer da’vosini qisman qanoatlantirib, javobgardan da’vogar foydasiga 355 million 242 ming so‘m boy berilgan foydani undirishni belgilagandi. Keyinchalik yuqori turuvchi instansiyalar mazkur qarorni bekor qilib, fermerning da’vo talabini rad etdi. Shu sabab fermer Oliy sudga murojaat qildi.
Qashqadaryo viloyat sudi iqtisodiy ishlar bo‘yicha sudlov hay’ati apellyatsiya instansiyasi sudining 2024-yil 18-apreldagi qarori bilan Qarshi tumanlararo iqtisodiy sudining 2024-yil 5-fevraldagi hal qiluv qarori bekor qilinib, da’vo talabi rad qilgandi. Viloyat sudining iqtisodiy ishlar bo‘yicha sudlov hay’ati apellyatsiya instansiyasi 2024-yil 1-avgustdagi qarori bilan mazkur sudning hal qiluv qarorini o‘zgarishsiz qoldirgandi.
Samarqand viloyat sudining iqtisodiy ishlar bo‘yicha sudlov hay’ati esa mazkur ishni taftish tartibida ko‘rib chiqib, 2024-yil 1-avgustdagi qarori bilan Qarshi tumanlararo iqtisodiy sudining 2024-yil 5-fevraldagi hal qiluv qarori va Qashqadaryo viloyat sudining iqtisodiy ishlar bo‘yicha sudlov hay’ati apellyatsiya instansiyasining 2024-yil 18-apreldagi qarorini bekor qildi. Fermerning da’vo talabini qisman qanoatlantirib, boy berilgan sof foyda 355 million so‘m emas, 44 million so‘m deb topib, yangi qaror qabul qildi. Fermer bu qarordan ham qanoatlanmay, Oliy sudga shikoyat kiritdi. Ish Oliy sudda ko‘riladigan bo‘ldi.
“Samandar Nur” fermer xo‘jaligining taftish tartibidagi shikoyati hamda Bosh prokuror o‘rinbosarining ishni taftish tartibida ko‘rib chiqish to‘g‘risidagi protesti ish yuritishga qabul qilinsin va sud muhokamasida ko‘rib chiqish uchun Oliy sudning iqtisodiy ishlar bo‘yicha sudlov hay’atiga o‘tkazilsin. Fermer xo‘jaligining taftish tartibidagi shikoyati hamda Bosh prokuror o‘rinbosarining ishni taftish tartibida ko‘rib chiqish to‘g‘risidagi protesti 2024-yil 26-noyabr kuni soat 11:30 sud muhokamasida ko‘rib chiqilishi belgilansin, deyiladi Oliy sud sudyasi Rustamovning bu haqdagi ajrimida.
“Daryo” mazkur ishning Oliy sudda ko‘rilishini ham kuzatishda davom etadi.
Izoh (0)