Rossiya qo‘shinlari Ukrainaga ommaviy raketa va dronlar bilan hujum qildi. 26-avgust kuni tongda butun mamlakat bo‘ylab havo hujumidan trevoga yangradi. Bu haqda Meduza xabar berdi.
Ukraina energetika vaziri German Galushenkoning so‘zlariga ko‘ra, hujum maqsadi energetika infratuzilmasi obyektlari bo‘lgan.
“Vaziyat murakkab, hujumlar oqibatlari aniqlashtirilmoqda. Energetiklar ularni bartarf etish ustida ishlamoqda”, dedi u.
“Ukrenergo” kompaniyasi hujum munosabati bilan favqulodda elektr ta’minotini o‘chirish haqida ko‘rsatma berdi. Ukraina bosh vaziri Denis Shmigal Rossiyaning ommaviy hujumi natijasida 15 ta viloyat zarar ko‘rganini aytdi.
Dushman turli xil qurollardan foydalandi: dronlar, qanotli raketalar, “Kinjallar”. Yaradorlar va halok bo‘lganlar bor. Ularning qarindoshlari va yaqinlariga hamdardlik bildiramiz, dedi u.
Volinsk viloyatining Lutsk shahrida sodir bo‘lgan hujumda ko‘p qavatli uy va infratuzilma obyektiga zarar yetgan, bir kishi halok bo‘lgan.
- Zaporojye va Dnepropetrovsk viloyatida ikki kishi halok bo‘lgan. Jitomir viloyatida uy-joylar va muhim infratuzilma obyektlariga zarar yetgan. Bir ayol halok bo‘lgan.
- Kiyev viloyatida infratuzilma obyektlari, shuningdek, bir nechta xususiy uylarga zarar yetgan. Bir kishi yaralangan.
- Poltava viloyatida sanoat obyekti o‘qqa tutilishi oqibatida besh kishi yaralangan. Lvov, Rovno va Vinnitsa viloyatlarida energetika infratuzilmasi obyektlariga zarbalar qayd etilgan.
Odessa viloyatida energetika va fuqarolik infratuzilmasiga zarar yetgan, 4 kishi, jumladan, 10 yoshli bola jarohatlangan. Nikolay viloyatida uch kishi yaralangan. Ivano-Frankivsk viloyatida esa uch kishi jarohat olgan.
Kiyevda havo mudofaa kuchlari raketalar va 15 ga yaqin dronni yo‘q qilgan. Vayronagarchilik va jabrlangan shaxslar bo‘lmagan.
Biroq raketa hujumi sababli “Ukrenergo” favqulodda elektr energiyasini o‘chirishga ko‘rsatma berdi, deydi shahar harbiy ma’muriyati rahbari Sergey Popko.
Izoh (0)