Jinoyat ishlari bo‘yicha Mirzo Ulug‘bek tuman sudida 2024-yilning iyul oyida Toshkent shahrining Yashnobod tumanida sodir etilgan mudhish qotillik voqeasi ko‘rib chiqilayotgani xabar berilgandi. Sudning 18-noyabr soat 16:00 da davom etgan navbatdagi majlisida qotillikka qo‘l urgani aytilayotgan sudlanuvchi ko‘rsatmasi ham tinglandi. Bu haqda sudda qatnashgan “Daryo” jurnalisti xabar berdi.
“Chin qalbimdan pushaymonman, kechiringlar, musulmonlar. Iltimos qilib, meni afv etishlaringizni so‘rayman. Prezidentimiz Shavkat Mirziyoyevdan ham iltimos qilib, afv etishlarini so‘rayman”, deydi 31 yoshli sudlanuvchi.
Sudda prokuror so‘roviga javob qaytargan sudlanuvchi qonuniy nikohi yo‘qligini, shar’iy nikoh asosida marhum bolaning onasi N.N. ismli ayol bilan yashashini ma’lum qildi.
“Alloh guvohligida qonuniy nikohdan ham o‘tamiz. Qizimiz bor. Bir yildan beri birga yashab kelardik”, deydi u oilasi haqida gapirar ekan.
Davlat ayblovchisi sudlanuvchiga yuzlanib, “Bolaning nega aynan ko‘ziga tan jarohati yetkazdingiz?”, deya savol berdi. Savolga qo‘shimcha qilgan sudya esa sudlanuvchi 3 yashar bolani og‘irlashtiruvchi holatlar bilan qasddan o‘ldirgani sababi bilan qiziqdi. “O‘zi bu holat bo‘ldimi, qanday bo‘ldi?”, deya savol berdi.
“Esimda yo‘q, ko‘p kayf qilib yuborganman. ‘Guluk’da bo‘lganman, hamma biladi. Kechiringlar”, dedi sudlanuvchi savolga javoban.
Sudlanuvchining advokati uning so‘zlarini izohlar ekan, “guluk” so‘zini izohlab, “sudlanuvchi ichimga jin kirib qoldi, bolani o‘ldirishimni buyurdi deyapti”, deya qo‘shimcha qildi.
Sudlov hay’ati raisi bunga javoban sudlanuvchi tergov uchun hibsda ushlab turilgan vaqtda, ya’ni bir oy davomida doimiy maxsus kuzatuv ostida bo‘lganini, sud psixiatriya ekspertizasi bir oylik kuzatuvlardan so‘ng uning jinoyat sodir qilayotgan paytda ruhiy kasalliklar bilan og‘rimaganini, o‘zining jinoiy harakatlariga javob bera oladigan holatda bo‘lganini bildirganini ta’kidladi.
Sudlanuvchining o‘zi esa voqea sodir bo‘lgan paytda u narkotik va psixotrop dorilar ta’sirida bo‘lganini ma’lum qildi.
Izoh (0)