Manchester sudi yangi tug‘ilgan chaqaloqlarni o‘ldirishda aybdor deb topilgan hamshira Lyusi Letbini afv etish yoki shartli ravishda ozod qilish huquqisiz umrbod qamoq jazosiga hukm qildi. Bu Britaniya huquq tizimidagi eng qattiq hukmdir. Bu haqda BBC xabar berdi.
Tegishli hukmda ayblanuvchining harakatlari ongli sadizm (birovni qiynab, bundan rohatlanish) toifasiga kiritilgan. Letbi Angliya huquqi tarixida umrbod qamoq jazosiga hukm qilingan to‘rtinchi ayol bo‘ldi.
Britaniya tizimida umrbod qamoq jazosining ikki turi mavjud.
- Ulardan biri (umrbod qamoq jazosi) mahkumning muddatidan oldin ozod qilish huquqini nazarda tutadi. Sudya ayblanuvchi appelyatsiya huquqiga ega bo‘lgunga qadar uning qamoq muddatini darhol aniqlaydi.
- Ikkinchi tur (umrbodlik tartibi) og‘irligi va ijtimoiy zarari bo‘yicha favqulodda jinoyat sodir etilgan taqdirda, ko‘pincha ketma-ket qotilliklar uchun tayinlanadi. Mahkum muddatidan oldin ozod qilish yoki afv etish huquqiga ega emas, bu faqat alohida holatlarda bo‘lishi mumkin.
Hukm e’lon qilinishidan oldin ham, Letbining advokatlari bu holatda ayblanuvchining jazosini yengillashtirish imkoni yo‘qligini bildirdi.
Letbi hukm e’lon qilinganda sud zalida bo‘lishdan bosh tortdi.
Britaniya bosh vaziri Rishi Sunak buni uyatli qo‘rqoqlik deb atadi. U hukumat mahkumlarni hukmda hozir bo‘lishga majburlovchi qonunchilikka o‘zgartirishlar kiritishini aytdi.
“Yangi tug‘ilgan chaqaloqlarning hayoti boshlangan zahotiyoq yo‘q qilindi, ularning yaqinlarining hayoti esa abadiy barbod bo‘ldi. Qilmishingiz sababi faqat sizga ma’lum”, — dedi sudya Goss.
Hamshira Letbi nimada ayblanmoqda?
Yettita isbotlangan qotillikdan tashqari, Letbining sudida uning aybi yana oltita chaqaloqning hayotiga suiqasd qilishda ham isbotlangan.
Sud jarayonida ko‘rib chiqilgan yana olti epizod bo‘yicha sudya hukm chiqara olmagan.
Lyusi Letbi 2015-yil iyunidan 2016-yilning iyuniga qadar Chester kasalxonasida ishlayotgan vaqtida yangi tug‘ilgan chaqaloqlarga shprits bilan havo yuborgan. Shuningdek, u ortiqcha ovqatlantirish va insulin bilan zaharlash kabi usullarni qo‘llagan.
Letbining ba’zi hamkasblari birinchi uchta o‘limdan keyin undan gumon qilgan. Sababi barcha holatlarda, ya’ni bolalar o‘limi paytida u xizmatda bo‘lgan.
Biroq shifoxona ma’muriyati avvaliga buni jiddiy qabul qilmagan.
Politsiya 2017-yil may oyida chaqaloqlarning o‘limi bo‘yicha tergov boshlagan, 2020-yil noyabr oyida Letbiga nisbatan ayblov e’lon qilindi. Sud 21-avgust kuni hamshiraga nisbatan hukm chiqardi.
Buyuk Britaniyada umrbod qamoq jazosi
Britaniyada umrbod qamoq jazosi 1983-yildan beri qo‘llanilmoqda. Deyarli 20 yil davomida faqat mamlakat ichki ishlar vaziri bunday hukm chiqarishi mumkin edi, biroq 2002-yilda qaror qabul qilish vakolati sudyalarga o‘tgan.
- Mayra Hindli 1990-yilda Britaniyada umrbod qamoq jazosiga hukm qilingan birinchi ayol edi. U qotillikda ayblangan va 2022-yil hibsda vafot etgan.
- Yana ikki nafari — Rouz Uest va Joann Dennexi — hali ham jazo o‘tamoqda. Uest 1995-yilda eri Fred Uest bilan 10 ta qotillik uchun hukm qilingan. Dennexi 2014-yilda uch kishining qotilligida ayblangan.
Izoh (0)