Samarqand viloyatidagi tuman sudi raislaridan birining haydovchisi 300 dollar pora bilan ushlanib, sud hukmiga ko‘ra 2 yil muddatga ozodlikdan mahrum qilindi. Bu haqda Telegram’dagi “Generalissimus” kanali xabar tarqatgach, “Daryo” bu haqdagi sud hukmi bilan tanishib chiqdi.
Sudda aniqlashtirilishicha, 32 yoshli sudlanuvchi H.I. 2023-yilning 10-oktyabr kunidan boshlab jinoyat ishlari bo‘yicha Bulung‘ur tuman sudi raisi haydovchisi sifatida ishlab kelgan.
U aldash yoki ishonchni suiiste’mol qilish yo‘li bilan o‘zganing mulkini qo‘lga kiritish maqsadida fuqaro G.K.ning ishonchiga kirib, Samarqand tuman sudining 2023-yil 13-sentyabrdagi qarori bilan 1 yil 6 oy muddatga transport vositasini boshqarish huquqidan mahrum qilingan fuqaroning o‘talmay qolgan jazo muddatini sud hamda viloyat IIB yo‘l harakati xavfsizligi organlarida ishlovchi tanishlari orqali hal qilib, haydovchilik guvohnomasini olib berishini va’da qilgan.
Sud raisining haydovchisi 2024-yilning 18-iyul kuni kelishilgan 300 dollarni o‘zi boshqarib yurgan xizmat avtomobilida olgan vaqtida Bosh prokuratura huzuridagi Iqtisodiy jinoyatlarga qarshi kurashish departamenti Samarqand viloyati boshqarmasi va DXX viloyat boshqarmasi xodimlari tomonidan qo‘lga olingan.
Sud majlisida so‘roq qilingan sudlanuvchi aybiga to‘liq iqrorlik bildirib, sud aniqlashtirgan holatlarni tasdiqlagan. Xatti-harakatini esa sog‘lig‘ini tiklash uchun pul zarur bo‘lib qolgani, oylik-maoshini olgach, qaytarmoqchi bo‘lgani bilan izohlagan.
Mazkur ishga raislik qiluvchi sudya Bekzod Jumaboyev sudlanuvchini Jinoyat kodeksining 25,168-moddasi 1-qismi va 28,211-moddasi 1-qismida nazarda tutilgan jinoyatlarni sodir etganlikda aybdor deb topdi. Sobiq haydovchi uzil-kesil 1 yil muddatga huquqni muhofaza qiluvchi, sud, prokuratura va davlat ishtirokidagi barcha korxonalar, muassasalar yoki tashkilotlarida mansabdorlik va moddiy javobgarlik lavozimlarida ishlash huquqidan mahrum qilinib, 2 yil muddatga ozodlikdan mahrum qilindi. Jazo manzil koloniyalarda o‘taladigan bo‘ldi.
Izoh (0)