“Daryo”da Qashqadaryo viloyat sudining iqtisodiy ishlar bo‘yicha sudlov hay’ati taftish instansiyasida kutilmagan holat ro‘y bergani hikoya qilingandi.
Maqolada javobgar “Samandar nur” fermer xo‘jaligining da’vogar “Agrobank” ATBga nisbatan iqtisodiy ish bo‘yicha Qarshi tumanlararo iqtisodiy sudining 2023-yil 2-avgustdagi hamda Qashqadaryo viloyat sudi iqtisodiy ishlar bo‘yicha sudlov hay’ati kassatsiya instansiyasining 2024-yil 15-avgustdagi qarorlarining bekor qilinishi so‘rab yozilgan taftish shikoyatini ko‘rib chiqayotgan sudlov hay’ati tarkibida o‘zgarish bo‘lgani, muzokara bosqichida raislik etuvchi to‘satdan ta’tilga chiqib, o‘rnini boshqa sudya egallagani ma’lum qilingandi. Bundan norozi bo‘lgan fermer va uning advokati Oliy sudga murojaat qildi.
Hozirgi kunga qadar “Agrobank”ning Nishon filiali bilan sudlashib kelapmiz. Bu ish Qashqadaryo viloyat sudida taftish tartibida ko‘rilayotgandi. Ishni ko‘rib chiquvchi sudlov hay’ati raisi Astanov holatga chuqur yondashib, qonuniy ko‘rib kelayotgandi.
Ammo ishning muzokaraga o‘tish jarayonida Astanovning to‘satdan ta’tilga chiqishi va sudlov hay’ati raisining o‘zgarib qolishi bizda shubha uyg‘otdi. Shu sabab bu haqda Oliy sudga murojaat qilib, ochiqlik va shaffoflikni ta’minlash maqsadida ishni boshqa viloyat sudi ko‘rib chiqishini iltimos qilgandik.
Bugun Oliy sud raisi o‘rinbosari Shuhrat Polvonov ko‘rib chiqdi va arizamizni qanoatlantirdi, deydi bu haqda “Daryo”ga ma’lumot bergan fermer.
Shikoyatchi fermerni qabul qilgan Oliy sud raisi o‘rinbosari, Iqtisodiy ishlar bo‘yicha sudlov hay’ati raisi Shuhrat Polvonov fermerga sudlov hay’atini rad qilishi va bu haqda Oliy sudga shikoyat qilishi xatoligini tushuntirdi.
“Siz ishni Qashqadaryodagi sud tarkibi ko‘rishga rozi emasman deb raddiya beryapsiz-da, shu sabab biz xatda sizga bu haqda yozib “otvod”ni ko‘rib chiqish bizning, ya’ni Oliy sudning vakolatiga kirmasligini, buni Qashqadaryoning o‘zi hal qilishini yozyapmiz. Siz boshqa sabablarni yozib, bizga oddiy ariza bering. Siz “otvod” bermay, hozir menga ikki qator ariza yozib bering men ishni boshqa viloyatga o‘tkazib beraman. Muammo yo‘q, dedi Oliy sud raisi o‘rinbosari fermer bilan muloqot qilar ekan.
Oliy sud raisi o‘rinbosari qabulidan chiqqan fermer muammosi tez va oson hal bo‘lgani uchun Oliy sud rahbariyatiga tashakkur izhor qildi.
Mana shunday fidoyi, ishni odilona ko‘radigan sudyalar ko‘paysin, deydi shikoyatchi fermer.
Avvalroq sudya Bozorov raisligidagi Qashqadaryo viloyat sudi iqtisodiy ishlar bo‘yicha sudlov hay’ati taftish instansiyasi qarori bilan “Samandar nur” fermer xo‘jaligining zararni undirish bo‘yicha javobgar MIB Nishon tuman bo‘limidan undirilishi belgilangan 355 million so‘m miqdordagi Qarshi tumanlararo iqtisodiy sudi tomonidan qanoatlantirilgan qarori asossiz ravishda bekor qilingan.
Mazkur apellyatsiya instansiyasi qarori 2024-yil 1-avgust kuni Samarqand viloyat sudi iqtisodiy ishlar bo‘yicha sudlov hay’ati taftish instansiyasi tomonidan to‘liq bekor qilinib, “Samandar nur” fermer xo‘jaligi foydasiga qaror qabul qilingani xabar berilgandi.
“Daryo” voqealar rivojini kuzatishda davom etadi.
Izoh (0)