15-may kuni Angliyadagi ruhiy xastaxonalardan birida 79 yoshida Ien Breydi vafot etdi. U 1960-yillarda dugonasi Mayra Xindli bilan birga besh nafar bola va o‘smirni zo‘rlab, o‘ldirgani bilan “nom qozongan”. Meduza’ga ko‘ra, qotilni yarim yil davomida ko‘mishning imkoni bo‘lmagan.
Ien Breydi va Mayra Xindli 1963–1965-yillarda Manchester atrofida sodir etgan jinoyatlar tarixda “botqoqdagi qotilliklar” (Moors Murders) nomini olgan. O‘sha payti hali 30 ga to‘lmagan jinoyatchilar 10–16 yosh orasidagi besh o‘smirni o‘ldirib, tanalarini Seddluort yalangligida yashirib qo‘ygan.
1963-yil 12-iyulda Mayra Xindli 16 yoshli tanishi Polin Ridni mashinasiga mindirdi. Xindli uni Seddluort yalangligiga olib bordi. Ularning ortidan voqea joyiga Ien Breydi mototsiklda yetib keldi. U qizni zo‘rlab, o‘ldirdi, so‘ng juftlik tanani ko‘mib qo‘ydi. Qizning tanasi 1987-yili topildi — o‘shanda jinoyatchilar qotillikni tan olgan edi.
O‘sha yilning 23-noyabrida Manchester bozorida Xindli va Breydi 12 yoshli Jon Kilbraydni aldab, yana o‘sha yerga olib keldi. Kilbraydning boshiga ham Polin Ridning taqdiri tushdi.
1964-yil 16-iyunida Manchester chetida 12 yoshli Kit Bennet g‘oyib bo‘ldi. Breydi va Xindli uni o‘ldirganlikda 1980-yillarda iqror bo‘ldi, ammo bolaning tanasi shu paytgacha topilgan emas.
26-dekabr kuni Breydi va Xindli yarmarkadan 10 yoshli Lesli Enn Daunini olib ketdi. U qiz ham o‘ldirildi.
1965-yil 6-oktabrida Breydi va Xindli o‘z uylarida 17 yoshli Edvard Evansni o‘ldirdi. Qotillik joyida Xindlining qarindoshi Devid Smit ham bor edi. Jinoyatchilar unga tanani yo‘q qilishni topshirdi, lekin Smit politsiyaga murojaat qildi, shu bilan jinoiy juftlik qo‘lga olindi.
1966-yil mayida sud Ien Breydini Jon Kilbrayd, Lesli Enn Dauni va Edvard Evansning, Mayra Xindlini esa Dauni va Evansning o‘limida aybdor deb topdi. Ular umrbod qamoq jazosi oldi. 1985-yili Ien Breydi jinni deb tan olinib, mahbuslarga mo‘ljallangan ruhiy kasalxonaga joylashtirildi. U yerda erkak jurnalistlar bilan suhbatlar davomida Polin Rid va Kit Bennetni o‘ldirganini tan oldi.
Mayra Xindli umrining oxiriga qadar qamoqdan chiqishga urindi. U 2002-yili vafot etdi. Hech bir dafn byurosi uni ko‘mish bilan shug‘ullanishni istamadi. Natijada o‘lgan yeridan yuzlab kilometr uzoqda yoqib yuborildi. Xoki esa Seddluort yalangligidan 15 kilometr naridagi bog‘da sochib yuborildi.
Breydi esa ko‘proq umr ko‘rdi va shu yilning 15-mayida o‘ldi.
Tuman koroneri Sefton jinoyatchining tanasini dafn uchun topshirishga rozi bo‘ldi, lekin bitta talabni ilgari surdi — uning xoki Seddluort yalangligi uzra sochib yuborilishi kerak edi.
Teymsayd tumani va Oldxem shahri ma’muriyati sudga murojaat qilib, nihoyat dafn masalasini hal qilishni so‘radi. 9–10-oktabr kunlari London yuqori sudi eshituvlarida kelishuvga erishib bo‘lmadi.
Natijada sudya ser Jeffri Vos Breydini dafn etish uchun javobgarni tayinlash va u dafn marosimini aynan qanday amalga oshirishini belgilashga qaror qildi.
Marhumning advokati Robin Makin bunday huquqdan mahrum etilib, taan Teymsayd ma’muriyati xodimalaridan biriga berildi.
Hukmda, shuningdek, diniy marosim o‘tkazish va musiqa qo‘yish taqiqlanishi belgilandi. Buning bari uzoq vaqt sir tutildi.
2-noyabr kuni Ien Breydining tanasi 25-oktabr kuni Liverpul qirollik shifoxonasidan olib ketilib, Sautport krematoriysida yoqib yuborilgani ma’lum qilindi. Tungi soatlarda qotilning xoki og‘irlashtirilgan idishga solinib, Liverpul bandargohidan dengizga qo‘yib yuborildi.
Buning bari 3-noyabr kuni jamoatchilikka oshkor etildi.
Izoh (0)