BAA Ichki ishlar vazirligi tegishli xavfsizlik idoralari Moldova va Isroil fuqarosi Zvi Koganning o‘ldirilishida ayblanib qo‘lga olingan uch nafar shaxs bilan dastlabki tergov ishlarini boshlaganini ma’lum qildi.
Qayd etilishicha, gumonlanuvchilarning barchasi O‘zbekiston fuqarolari: Olimboy Tohirovich — 28 yosh; Mahmudjon Abdurahim — 28 yosh; Azizbek Komilovich — 33 yoshda.
Marhum Isroil va Moldova fuqaroligiga ega bo‘lib, yahudiylarning “Xabad” diniy harakatida faoliyat yuritgan. BAA rasmiylari Zvi Kogan 21-noyabrdan buyon bedarak yo‘qolganini aytgan. Ravvinning oilasi uning yo‘qolgani haqida xabar bergan zahotiyoq qidiruv-tergov guruhi tuzilgan.
Huquq-tartibot idoralari 24-noyabr kuni erkakning jasadini topib, jinoyatchilarning shaxsini aniqlashga muvaffaq bo‘lgan. Hozirda gumonlanuvchilar qamoqda saqlanmoqda, sud jarayoni boshlangan.
Rasmiylarning aniqlik kiritishicha, Zvi Kogan BAA rezidenti va mamlakatga kirish paytida Moldova fuqarosi bo‘lgan. U BAAdagi yahudiy jamoasi bosh ravviniga yordamchilik qilgan va Dubaydagi “Rimon” kosher supermarketini boshqargan. Qo‘shimcha tafsilotlar qotillik bo‘yicha tergov yakunlangach e’lon qilinadi.
Isroil rasmiylari ravvin o‘limida o‘zbekistonliklarni gumon qilmoqda
Yahudiy rasmiylari ushbu qotillik bo‘yicha O‘zbekiston fuqarolarini gumon qilmoqda. Bu haqda The Times of Israel xabar bergan. Unga ko‘ra, Eron tomonidan yollangan bir guruh o‘zbekistonliklar ravvinga hujum qilgan. Shundan so‘ng ular Turkiyaga qochib ketgani da’vo qilingan.
Isroil bosh vaziri Binyamin Netanyaxu qotillarni qo‘lga olish uchun barcha mavjud vositalardan foydalanishga va’da bergan. “Ulardan birortasi ham omon qolmaydi”, degan u.
Zvi Koganning o‘ldirilishi jinoiy antisemitik terrorchilik harakatidir. Isroil davlati uning o‘limida aybdor bo‘lgan jinoyatchilarni, albatta, javobgarlikka tortadi va buning uchun barcha yo‘llar bilan harakat qiladi, deya ta’kidlangan Isroil Tashqi ishlar vazirligi bayonotida.
Izoh (0)