“Nadomat” loyihasining navbatdagi suhbatdoshi asli namanganlik bo‘lib, ayni kunda jazo muddatini Zangiota tumanidagi 42-sonli manzil koloniyasida o‘tamoqda. To‘rt qizning onasi va bir nechta nabiralarning buvisi bo‘lgan ayol qilgan jinoyatidan pushaymon bo‘lgan. Ammo vaqt ortga qaytmaydi va jinoyatlar ham unutilmaydi.
Mahkuma — 54 yoshda, u Jinoyat kodeksining 131-moddasi bilan aybdor deb topilib, 4 yil-u, 10 oyga ozodlikdan mahrum etilgan. Ayol ikki marta qo‘shmachilik jinoyatini sodir etishda ayblangan.
— O‘n uch yoshimdan buyon tikuvchilik bilan shug‘ullanaman. Shu hunarimning ortidan bolalarimni boqdim, ularni turmushga berdim. Ammo bunday vaziyatga tushaman, deb o‘ylab ko‘rmagandim.
Birinchi turmushimdan uchta qizim bor. Yaxshi oilaga kelin bo‘lgandim, qaynotam olamdan o‘tganidan keyin turmush o‘rtog‘im otasiga kuyib xastalanib qoldi. Ancha vaqt tobi bo‘lmadi, uchta qizim bilan qiynaldim. Oilada ko‘pgina muammolar yuzaga keldi. Qaynog‘am bilan bir hovlida turardik. Mahalla qiz-ayollari shomdan keyin chiqishsa yoki shogird qizlarim kelishsa, janjal ko‘taradigan bo‘ldi. Shunda otam rahmatli kelib, “Qizim yomon ish bilan shug‘ullanayotgani yo‘q. Agar xotin-qizlarning uyingizga kelishi yoqmasa, ukangiz ro‘zg‘orni eplab olsin”, deb gapirgan. Ammo bundan keyin ham tinchlik bo‘lmadi, ajrashib ketib, ota hovlimga qaytib keldim.
Akam bilan birga yashardik, bolalar o‘rtasidagi kelishmovchilik sabab kelinoyim bilan munosabatlarimiz buzildi. Uyga sig‘mayotganim uchun turmushga chiqdim. Yana bir qiz farzandli bo‘ldim, ammo u turmushim ham uzoqqa cho‘zilmadi. To‘rt bola bilan yana ota hovlimga qaytib keldim. Qizlarim ketma-ket ulg‘ayib, ostonamizdan sovchilar arimay qoldi. Uchta qizimni turmushga berdim va uyimizda kichkinagina tikuvchilik sexi ochdim. Kenja qizimning tug‘ilgan kunini nishonlaydigan kunimiz shogird qizlarimdan biri dugonasi bilan keldi. O‘sha dugonasi yomon ishlar bilan shug‘ullanarkan, shogirdim “Opa, o‘zingiz gaplashib bering, bir yigit kelmoqchi”, dedi. U yigit ostonamga keldi va u bilan gaplashib, 100 ming so‘m evaziga qizni chiqarib yubordim.
Oradan hech qancha vaqt o‘tmay, xodimlar kelib mendan dorilangan pulni olishdi. Keyin bilsam eski shogirdlarimdan biri ish o‘rganayotgan qiz bilan qasdlashib qolgani uchun buni uyushtirgan ekan. “Nega meni o‘yingga aralashtirdinglar”, desam “Siz ham qo‘shilib qolishingizni bilmagandim, men qizlarni qo‘lga tushirib bermoqchi edim”, dedi. Tan olaman, o‘sha kuni qizimning tug‘ilgan kuni bo‘lgani uchun bir kam-ko‘stimizga yarar deb pulni olganman. Buni sudda ham yashirganim yo‘q. Bundan avval ham shunga o‘xshash voqea sodir bo‘lgandi. Yaʼni dang‘aralik shogirdlarimdan biri shu ish bilan shug‘ullangan va sex mening nomimda bo‘lgani uchun menga qarshi ish ochilgan. U ish yopilmay turib, bunisi ulanib ketgani uchun meni ozodlikdan mahrum etishdi.
Lekin ishonch bilan aytolaman, uyimda fohishaxona saqlamaganman. Chunki akam bilan bitta hovlida turamiz, uning o‘g‘illari bor. Uyimizga birorta begona erkak kirib chiqmaydi.
Ozodlikdan mahrum etilganimdan keyin qizlarimdan birining turmushi bo‘lmay qaytib kelibdi. U 14 yoshli kenja qizimga qarab, uyda o‘tiribdi. Ammo yosh bolalar bilan ro‘zg‘or tebratish unga ham oson bo‘layotgani yo‘q. Yaqinda hammom buzilib qolibdi, qizlarim nima qilishni bilmay yig‘lab qo‘ng‘iroq qilishdi. Oilamizda erkak kishining yo‘qligi ko‘p pand beradi. Yaxshiyamki, katta kuyovim yaxshi, ko‘p vaziyatlarda yordam beradi. Qamalmasimdan avval seximizda kredit asosida bir nechta tikuv mashinalari xarid qilgandim, puli to‘lanmagani uchun mashinalarni olib ketishibdi. Nasib qilsa, ozodlikka chiqqach, hammasini qaytadan boshlayman. Bu yerda ko‘zlarim ochildi, deydi mahkuma.
Videoni to‘liq holda YouTube’dagi “Daryo media” kanalida tomosha qilishingiz mumkin.
Izoh (0)