Qashqadaryo viloyatining Yakkabog‘ tumanida yashovchi 30 yoshli Jamshid Xushboqov pichoqlab o‘ldirildi. Marhumning yaqinlari uni bir necha kishi o‘ldirgan, degan gumonda. Tuman prokuraturasi esa mazkur jinoyatda bir nafar shaxsni ayblagan va qamoqqa olgan.
“2019-yil 27-sentabr kuni soat taxminan 17:00 da erimning telefoni jiringladi. Telefonga javob bergan turmush o‘rtog‘im: ‘Qayerga chiqishim kerak? Xo‘p, bog‘chaning oldiga chiqaman unda’, deya telefonini o‘chirdi. Keyin namoz o‘qiyotgan paytida darvozamiz oldiga mashina kelib to‘xtadi va signal chaldi. Erim chiqavermagach, darvozamiz judayam qattiq taqilladi. Shunchalik vahimali ediki, buzib yuborgudek edi. Shunda qaynonam: ‘Eshikka qara-chi, kim ekan?’ dedi. Darvoza tomon yurdim, ammo ochishga ulgurmadim. Eshik ochilib, hovliqqan, ko‘zlari alang-jalang, vahimali ko‘rinishdagi bola: ‘Jammi akam chiqyaptimi?’ dedi. Keyin ko‘rsam, o‘sha bolaning rangi sariq ekan. Biroq o‘sha kuni qo‘rquvdanmi yoki boshqa sababmi uning rangi qorayib, kuyikkan rangda edi”, — deydi o‘sha kungi voqea haqida gapirgan marhumning xotini Aziza Tursinaliyeva.
“Daryo” muxbiri bilan suhbatlashgan marhumning yaqinlari uning o‘limida bir necha kishining qo‘li borligini aytmoqda.
“Tuman prokuraturasi erimning o‘limida bir kishini ayblayapti. Va sudga ham shunday ma’lumot berilgan. Holbuki o‘sha kuni erimni uch kishi olib ketgandi. Men erimni olib ketish uchun kelganlarning mashinasini ko‘rgandim. Erimni chaqirish uchun darvozadan qaragan kishidan tashqari mashinada yana ikki kishi bor edi”, — deydi Aziza Tursinaliyeva.
Marhumning xotini erini olib ketganlarni ko‘rgan yagona guvoh u bo‘lsa-da, prokuratura tergov davomida uni umuman eshitmaganini, shu boisdan ham prokuraturaning tergoviga ishonmasligini, o‘sha tergov xulosasi asosida o‘tayotgan sud ham adolatsizlik qilayotganini ta’kidlamoqda.
“Erimni olib ketganlar uch kishiligini, uning o‘limida Sh.S.dan tashqari yana ikki kishining qo‘li borligini aytish uchun tuman prokuraturasi hamda viloyat prokuraturasiga bir necha marotaba bordim. Ammo meni eshitishni istashmadi. Endi sudda ham bu gaplarim inobatga olinmayapti”, — deydi marhumning turmush o‘rtog‘i.
Aziza Tursinaliyevaning ta’kidlashicha, eri kech soat 17:00 da uch nafar shaxs bilan chiqib ketgach, soat 19:00 da erining telefon raqamidan qaynonasiga qo‘ng‘iroq bo‘lgan va uning shifoxonada ekanligi aytilgan.
“O‘sha kuni taxminan soat 19:00 da erimning telefon raqamidan qaynonamga qo‘ng‘iroq bo‘ldi va erimning shifoxonada og‘ir ahvoldaligi xabar qilindi”, — deydi marhumning xotini.
Xabar berilishicha, marhumning yaqinlari shifoxonaga borganda Jamshid Xushboqov komada bo‘lgan.
“O‘sha kuni menga Jamshid o‘g‘limning telefonidan qo‘ng‘iroq bo‘ldi. Javob bersam, o‘g‘lim emas, boshqa odam ekan. O‘g‘limni shifoxonada, ahvoli og‘ir deyishdi. Yetib borsak, o‘g‘lim koma holatida ekan. Ammo 29-sentabr kuni vafot etdi. O‘sha kundan beri adolat izlayman, ammo na prokuratura, na sud adolatli ish qildi. Hammasi adolatsizlik qilmoqda”, — deydi marhum Jamshid Xushboqovning onasi Sabohat Muqimova.
Mazkur jinoyat ishi sudga o‘tkazilgan bo‘lib, bir nechta tuman sudlarida ko‘rib chiqilgan va ayni kunda G‘uzor tuman sudida ko‘rib chiqilmoqda.
Jabrlanuvchilarning advokati O‘ktam Xudoyberdiyev hamda Oybek Rahimovlarning ma’lumot berishicha, tergov jarayoni tajribasiz xodim tomonidan olib borilganligi sababli ko‘plab savollar ochiq qolgan.
“Mazkur jinoyat ishi bir guruh shaxslar tomonidan amalga oshirilgan bo‘lishi yoki bu taxmin inkor etilishi mumkin. Biroq tergov jarayonida tajribasizlikka yo‘l qo‘yilgani bois mazkur savol javobsiz qolgan. Sud ham tergov jarayonida aniqlangan holatlar bo‘yicha sudlanuvchi, jabrlanuvchi va guvohlar fikrini eshitish bilan kifoyalanmoqda. Biz jinoyat ishini oydinlashtirish uchun iltimosnomalar kirityapmiz. Biroq barcha iltimosnomalarimiz rad etilmoqda”, — deydi advokat Oybek Rahimov.
Oybek Rahimovning ma’lumot berishicha, sudlanuvchi Sh.S. tergovdagi ko‘rsatmasida marhum uni ip bilan bo‘g‘gani sabab jon talvasasida unga pichoq sanchganini bildirgan.
“Sudlanuvchi Sh.S. marhum mashinaning orqa o‘rindig‘ida o‘tirib, uning bo‘ynidan ip bilan bo‘g‘gani uchun unga pichoq sanchganini bildirgan. Ammo tergovda voqea joyi ko‘zdan kechirilgan, ammo o‘sha ip qayerdaligi so‘ralmagan va topilmagan. Butun boshli guruh topolmagan ipni esa keyinchalik sudlanuvchining advokati tergovchiga taqdim qilgan. Bu judayam shubhalimasmi?”, — deydi advokat Oybek Rahimov.
O‘sha kuni voqeani kuzatib turgan guvoh voqea joyidagi oshxona ishchisi Bayram Umrzoqov voqea haqida shunday deydi.
“Nexia-3’da ikki kishi kelib to‘xtadi. Mashinadan tushmasdan, rosa urishib, so‘kishishdi. So‘ng rulda o‘tirgan kishi mashina eshigini ochib, oyog‘ini yerga qo‘ydi. Ammo mashinadan tushmadi. Shunda janjal kuchaydi, shekilli, mashina rulida o‘tirgan kishi old o‘rindiqda o‘tirgan sherigiga pichoq urdi. Keyin mashinadan tushib, boshini changallab turdi. Biroz o‘tib esa pichoqdan yaralangan sherigini sudrab mashinada tushirdi-da, mashinaga qattiq gaz berib, voqea joyidan ketdi”.
Jabrlanuvchining himoyachisi Oybek Rahimov marhum va sudlanuvchi telefon orqali muloqot qilganda tortishganini, shunda uchinchi shaxsning ovozi eshitilib qolganini, biroq bunga tergov ham, sud ham e’tibor qaratmayotganini aytmoqda.
“Sudga taqdim qilingan shu ovoz stenogramma qilinmagan va sudning e’tiboridan chetda qolmoqda. Buni o‘z vaqtida tergov ham e’tiborsiz qoldirgan. Tergov jarayonida telefon qo‘ng‘iroqlari va raqamlar aniqlashtirilib, bu ovoz kimnikiligiga aniqlik kiritilishi lozim edi. Jabrlanuvchilar esa bunga e’tibor qaratilishini so‘rab, bir necha murojaat qilishgan. Biroq bu murojaatlar e’tiborsiz qoldirilmoqda”, — deydi jabrlanuvchilarning advokati.
Jabrlanuvchilarning yana bir advokati O‘ktam Xudoyberdiyevning ma’lumot berishicha, jinoyat ishi bir necha shaxslar tomonidan sodir etilgan bo‘lishi mumkinligi to‘g‘risidagi gumon sud tibbiy ekspertizasining o‘z xulosasini o‘zgartirishga urinishi sabab yanada kuchaygan.
“Sud tibbiy ekspertizaning dastlabki xulosasida marhumning bir nechta qovurg‘asi singani aytilgan. Keyinchalik esa bu xulosa o‘zgartirilib, ekspert adashgan degan gap aytildi. Bu esa bizdagi gumonning kuchayishiga sabab bo‘ldi. Shuningdek, sudga voqea joyida oshxona va to‘yxona borligi sabab voqea kuzatuv kamerasiga olingan bo‘lishi mumkinligini aytib, buni aniqlashtirish haqida iltimosnoma kiritdik. Biroq sud yana rad etdi”, — deydi O‘ktam Xudoyberdiyev.
Sud tibbiy ekspertizasi o‘z xulosasini o‘zgartirganini marhumning onasi ham ta’kidlamoqda.
“Sud tibbiy ekspertizasi xulosasini shaxsan o‘zim o‘qib chiqqanman. Tibbiyot xodimi bo‘lganim uchun dastlabki xulosa o‘zgarganini darhol sezganman. 2019-yil 29-sentabrdagi sud tibbiy ekspertizasining dastlabki xulosasida bosh miya shikastlanishi, chap yelka gematomasi, orqadan qattiq jism bilan urilgan degan joylari bor edi. Shuningdek, o‘g‘limning o‘ng tomonidagi 3, 4, 5-qovurg‘alar, chap tarafidagi 5, 6, 7-qovurg‘alar singani yozilgandi. O‘zgartirilgan xulosada esa texnik xato sabab qovurg‘alar singani xato yozilgani aytilgan. Bu ochiqchasiga jinoyatni yashirish-ku”, — deydi marhumning onasi.
Jamshid Xushboqov o‘limi bilan bog‘liq jinoyat ishini prokuratura yetarli darajada o‘rganmagan, deya xulosa qilgan marhumning yaqinlari ijtimoiy tarmoqlar orqali bir necha marotaba chiqish qilgan.
Mazkur chiqishlarga javob bergan Qashqadaryo viloyat prokuraturasi qotillik voqeasi 2019-yil 27-sentabr kuni soat 18:00 larda Yakkabog‘ tumanining Alaqarg‘a qishlog‘ida joylashgan “Baxtiyorov Shamshod Sherzod o‘g‘li” xususiy korxonasiga qarashli oshxona ro‘parasida sodir bo‘lganini ma’lum qilgan va bu ish bo‘yicha Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish) va 97-moddasining 1-qismi (qasddan odam o‘ldirish) bilan jinoyat ishi qo‘zg‘atilganini yozgan.
Prokuratura, shuningdek, jinoyat ishi bo‘yicha gumonlanuvchi Sh.S.ga ayblov e’lon qilinib, qamoq ehtiyot chorasi qo‘llanganini, jinoyat ishi 2019-yil 31-dekabr kuni ayblov xulosasi bilan Jinoyat ishlari bo‘yicha Chiroqchi tuman sudiga yuborilganini bildirgan.
Kezi kelganda ta’kidlash lozimki, mazkur jinoyat ishini ko‘rib chiqayotgan Jinoyat ishlari bo‘yicha G‘uzor tuman sudi ish ochiq sud majlisida ko‘rib chiqilayotgan bo‘lishiga qaramasdan, voqealar rivojini o‘rganmoqchi bo‘lgan “Daryo” muxbirining sud majlisida ishtirok etishiga ruxsat bermadi. Jurnalistning axborot olishiga to‘sqinlik qilgan sudya Nurbek Abdullayev harakatini karantin tartibiga amal qilayotgani bilan izohladi.
“Sud jarayoniga bir nafar OAV xodimiga ruxsat beramiz, shu bois sudga bloger kiritilib, “Daryo” muxbiri ishtirok etishiga ruxsat berilmaydi” degan sudya. Muxbirning “Agar televideniye xodimlari kelishsa, unda muxbirni kiritib operatorga ruxsat bermaysizmi yoki operatorni sud zaliga qo‘yib, muxbirning kirishiga to‘sqinlik qilasizmi?” degan savoliga javob bermadi. To‘g‘rirog‘i, javob berishni istamadi.
Jinoyat ishlari bo‘yicha G‘uzor tuman sudi raisi Nurbek Abdullayev jurnalistning axborot olishiga to‘sqinlik qilib, arzimas sababni vaj qilib ko‘rsatishda davom etmasa, “Daryo” voqealar rivojini kuzatib boradi.
Izoh (0)