Qashqadaryo viloyati sudining kassatsiya instansiyasida ko‘rilgan qudalar mojarosi kadastr xodimlari kirdikorlarini fosh qildi. Natijada sudlov hay’ati prokuraturaga xabarnoma yuboradigan bo‘ldi. Bu haqda sudda qatnashgan “Daryo” muxbiri xabar berdi.
Qashqadaryo viloyat sudining Fuqarolik ishlari bo‘yicha sudlov hay’ati tomonidan ko‘rib chiqilgan qudalar mojarosida Qamashi tumanida o‘zboshimchalik bilan egallab olingan yerlar kadastr xodimlari tomonidan qonuniylashtirib berilgani ma’lum bo‘ldi. Sudlov hay’ati raisi sudya Aqanov bu haqda prokuraturaga xabarnoma yuborishini bildirdi.
Da’vogar Laziz Shohliyevning sudda ma’lumot berishicha, u ukasining qaynotasi, ya’ni qudasi Baxtiyor Choriyev bilan sheriklikda ish qilishga kirishgan. O‘ziga tegishli 6 sotix yer-maydonidagi yashab kelgan uyini buzib, o‘rnida to‘yxona qurilishiga qarshilik bildirmagan. Evaziga qudasidan foizga olganini aytgan 2000 dollar pulning foizini qaytarmagan.
2021-yilning noyabr oyida foizga olingan pulni 3000 dollar qilib qaytarishim kerak edi. Ammo imkoniyatim bo‘lmagach, o‘sha olingan pulni ya’ni 2000 dollarni qaytardim. Qolgan 1000 dollarni qaytarolmaganim sabab, qudamizning shartiga ko‘nib, anchadan beri yashab kelayotgan uyimning buzilishi va o‘rnida to‘yxona qurilishiga rozilik bildirdim. Evaziga qudamizning rasmxona, do‘kon va aptekani menga berishiga kelishdik. Aslida yer mening nomimda edi, qudamiz kredit olish uchun yer mening nomimda bo‘lishi kerak degan vaj bilan yerni o‘zining nomiga o‘tkazib oldi. Buni Qamashidagi notariusda o‘zim tasdiqlab, imzo qo‘ydim, dedi u sudda bu haqda gapirar ekan.
Laziz Shohliyev yerning 2022-yil tuzilgan oldi-sotdi shartnomasida narxi ataylab pasaytirib ko‘rsatilganini, aslida kelishuv og‘izaki bo‘lganini aytmoqda.
Yerning oldi-sotdi shartnomasida uning narxini 5 million so‘m deb ko‘rsatdik. Sababi og‘zaki kelishuv bo‘yicha to‘yxona yonidan quriladigan rasmxona, do‘kon va apteka menga tegishi kerak edi. Lekin qudamiz va’dasida turmadi. To‘yxona qurilgach, faqat rasmxonani ishlatdim. Do‘konni o‘zimimiz ta’mirlab oldik. Lekin qizini ega qilib qo‘ydi. Keyinchalik esa to‘yxona-yu, rasmxonani biz qurgan do‘kon bilan qo‘shib sotdi, deydi u.
Sudda javobgar sifatida qatnashgan Baxtiyor Choriyev da’vogarning gaplarini rad etdi va yolg‘on deb atadi. Shuningdek, unga berilgan pulni qarzga berganini, foiz talab qilmaganini qo‘shimcha qildi. Uning aytishicha, u qurgan to‘yxona haqiqatan ham Laziz Shohliyevning qonuniy va noqonuniy egallangan yerida qurilgan. To‘yxona ishga tushgach 253 ta to‘y o‘tkazgan. To‘yxona ichidagi rasmxonani Laziz Shohliyevga bergan. Shuningdek, to‘yxona yonidagi do‘kon ham qudalariga berilgan.
Har doim urush janjal bo‘lib, tinch tadbirkorlik qilolmaganimdan so‘ng, to‘yxonani ham sotib yubordim, deydi sudda ko‘rsatma bergan javobgar.
Javobgarning aytishicha, u va da’vogar Laziz Shohliyev qonuniy hujjati bo‘lgan 6 sotix yer-maydoni va noqonuniy egallab olingan hududda to‘yxona va do‘kon qurgan.
Rasmxonani berdim, har bir to‘ydan kamida 100 ming so‘mdan ishlashdi. Biror bir ijara to‘lov yoki soliqqa yordam beringlar demadim. Sof daromad qilishdi. Do‘konni berdim. Ishlatishdi. Yana pul talab qilaverishgach, sotib yubordim, dedi taraflar savoliga javob bergan javobgar.
Javobgarning aytishicha, to‘yxona va do‘kon aslida 40 sotix maydonga qurilgan bo‘lib, shundan 6 sotix yer-maydonning qonuniy hujjati bo‘lgan. Qolgan yerlar esa o‘zboshimchalik bilan egallab olingan yerlar bo‘lib, unga Qamashi tuman kadastr xodimlari tomonidan qonuniylashtirib berilgan.
Sudda so‘z olgan guvoh To‘ra Karimov ham qudasi Baxtiyor Choriyev ularni aldaganini, va’da qilingan do‘kon, rasmxona va dorixonani ularga bermaganini shuningdek, o‘zlari yashab kelgan uy uchun ham pul to‘lamaganini ma’lum qildi.
Sudda da’vogar Laziz Shohliyevning advokati Lazizga tegishli Qamashi tumani O‘rta chim qishlog‘i “O‘rta Chim” MFY Chinorli ko‘chasi 110-uyni sotish bo‘yicha 2022-yil 10-mart kuni Qamashi tumanidagi xususiy notarial faoliyat bilan shug‘ullanuvchi notarius Mardon Mamatov tomonidan rasmiylashtirilgan oldi-sotdi shartnomasini Fuqarolik kodeksining 123-124-moddalari asosida haqiqiy emas deb topishni so‘radi. Javobgar advokati esa da’vo talabini rad etishni so‘radi.
Sudya Aqanov boshchiligidagi sudlov hay’ati qaror qabul qilar ekan, da’vo talabini rad etib, birinchi instansiya sudi tomonidan chiqarilgan qarorni o‘zgarishsiz qoldirib, 2022-yil 10-mart kuni tuzilgan oldi-sotdi shartnomani haqiqiy emas deb topishni rad qildi. Shuningdek, to‘yxonaning 40 sotix yer-maydonga qurilishi va qonuniy hujjati bo‘lgan 6 sotix yerdan tashqari o‘zboshimchalik bilan egallab olingan yer-maydonlari va uni qonuniylashtirib bergan kadastr xodimlari harakati yuzasidan prokuraturaga xabarnoma yuborilishini ma’lum qildi.
Izoh (0)