Samarqandda erkak shar’iy nikohdagi ayoli bilan o‘rtasida sodir bo‘lgan janjal oqibatida 1 yoshli o‘g‘lini o‘ldirib qo‘ydi. Bu haqda “Yoshlar” telekanalining “Yangi davr” informatsion dasturida ma’lum qilindi.
Ma’lum bo‘lishicha, er-xotin Samarqand shahridagi Go‘ro‘g‘li ko‘chasida joylashgan uylarning birida ijarada yashab kelgan. Qotillik sodir etilgan kuni erkak va ayol o‘rtasida o‘zaro janjal kelib chiqqan. Ayol erining aytganini qilmagani uchun erkak uning qo‘lidagi bolani olib, boshi bilan ikki-uch marta yerga urgan.
Bola voqea joyida vafot etgan. Erkak esa jinoyat joyidan qochib ketgan.
Holat bo‘yicha o‘tkazilgan sud majlisida ayblanuvchi o‘ziga qo‘yilgan aybga iqror bo‘lmagan. Sud ish hujjatlarini o‘rgangan, guvohlar va tomonlarning ko‘rsatmalarini tinglab, hukm chiqargan.
Sudlanuvchi Jinoyat kodeksining 97-moddasi (qasddan odam o‘ldirish) 2-qismi “v, j” bandlarida ko‘rsatilgan jinoyatni sodir etganlikda aybdor deb topilgan va unga 18 yil muddatga ozodlikdan mahrum etish jazosi tayinlangan.
Avvalroq Toshkentda 20 yoshli o‘g‘lini o‘ldirib, uni yerto‘laga ko‘mib qo‘ygan erkakka sud hukmi o‘qilgani, Qashqadaryoda mast ota o‘g‘lini temir bo‘lagi bilan urib, o‘ldirib qo‘ygani to‘g‘risida xabar berilgandi.
Izoh (0)