“O‘lim jazosini tiklash kerak deganlarga Konstitutsiya kitobini sovg‘a qilish kerak” — Odiljon Tojiyev

Qonunchilik palatasi spikeri o‘rinbosari Odiljon Tojiyev “Milliy tiklanish” partiyasi yetakchisi Alisher Qodirovning o‘ta vahshiy jinoyatlar uchun o‘lim jazosini tiklash zarurligiga shama qilingan postiga munosabat bildirdi.

Toshkentda 9-iyul kuni uch yashar bola qasddan o‘ldirilgani keng jamoatchilik muhokamasiga sabab bo‘lgandi. “Milliy tiklanish” partiyasi yetakchisi Alisher Qodirov murg‘ak bolaga vahshiylik qilgan inson yashamasligi kerak, deb munosabat bildirdi.

“Hayvonlashib ketgan jinoyatchini soliqlarimiz hisobiga sog‘lig‘ini saqlab, qornini to‘ydirib, boshqa inson bo‘lib qolishini kutib o‘tirish — mantiqsiz! Bundaylardan jamiyatni tozalash kerak!” — degan edi deputat.

Qonunchilik palatasi spikeri o‘rinbosari Odiljon Tojiyev begunoh go‘dakning umriga zomin bo‘lgan kimsalarning yashashga haqqi yo‘q, deya bildirilgan iddao “o‘lim jazosini tiklash kerak” degandek gapligini, bir qarashda adolatli va maqbul yechimdek ko‘rinadigan ushbu taklifga mutlaqo qo‘shilmasligini aytdi.

Uning bildirishicha, o‘lim jazosi ehtimoliy noxolis o‘tkazilgan tergov yoki noto‘g‘ri chiqarilgan hukm ta’sirida jazolangan begunoh insonning hayoti butunlay yo‘qotilishiga olib kelishi mumkin.

“Tarix tirik guvoh. Sud qarori qanchalik adolatli ko‘rinmasin, yillar o‘tib jinoyatchi aslida umuman boshqa shaxs bo‘lganligi aniqlangan keyslar juda ko‘p. Misol uchun kannibal Chikatilo uning qotilligi deb boshqa inson o‘lim jazosiga hukm qilingan”, — deydi Odiljon Tojiyev.

Deputatning fikricha, o‘lim jazosi jinoyatchilik darajasiga ta’sir ko‘rsatmaydi. Jinoyatlardan tiyib turadigan samarali vositalardan biri jazoning shafqatsizligida emas, muqarrarligida namoyon bo‘ladi.

“Qolaversa, o‘zga bir insonning umriga nuqta qo‘yishga sababchi bo‘lgan qotilga o‘lim jazosini bersak, o‘sha vahshiy kimsadan farqimiz qolmaydi. Davlat o‘zi bermagan hayotni olishga haqqi yo‘q, deb o‘ylayman. Yashash bu tabiiy huquq!” — deb ta’kidladi u.

So‘zining so‘ngida o‘lim jazosini tiklash kerak deganlarga Konstitutsiya kitobini sovg‘a qilish kerakligini qo‘shimcha qildi.