Toshkent viloyatining Bo‘ka tumanidagi tuman Tibbiyot birlashmasining Tug‘uruq bo‘limidan bir emas ikki o‘lik chiqdi. 2024-yilning 20-noyabr kuni 19 yoshli ayol va uning endigina tug‘ilgan qizalog‘i shifokorlar qo‘lida jon berdi. Bu haqda jamoatchilikka xabar bergan marhumaning qarindoshiga ko‘ra, ayol unga qilingan noto‘g‘ri ukol sabab olamdan o‘tgan bo‘lsa, uning endigina tug‘ilgan qizalog‘i esa ayolga ko‘rsatilayotgan tibbiy yordam paytida ona qornida jon bergan bo‘lishi mumkin.
“Daryo” ijodiy jamoasi voqea tafsilotlarini o‘rganish maqsadida Bo‘ka tumanida bo‘ldi.
Marhumaning turmush o‘rtog‘i va otasi, shuningdek qarindoshlariga ko‘ra, ular ayolning o‘limidan o‘sha kuni kechki payt 16:00 va 17:00 oralig‘ida xabar topgan.
Qon ketishdan bo‘ldi, uch marta tokka soldik, uch marta yurak ishladi, to‘rtinchisida yurak urmay qoldi. Shundan keyin tirishib qoldi.Ular yashirmoqda, aslida tokka ulagan paytda bola o‘lib qolgan bo‘lgan. Keyin operatsiya qilib bolani olishgan, deydi ular.
Marhuma o‘limidan avval onasiga qo‘ng‘iroq qilib, unga qandaydir ukol qilinganini, shundan so‘ng tobi qochganini ma’lum qilgan.
Menga 13:30 lar atrofida telefon qilib, qandaydir ukol qilishdi, shundan so‘ng mazam bo‘lmayapti, qon ketyapti dedi, deydi marhuma ayolning onasi.
Bo‘ka tuman tibbiyot birlashmasi boshlig‘ining onalik va bolalikni muhofaza qilish masalalari bo‘yicha bosh shifokor o‘rinbosari Marhabo Abdulazizovaning “Daryo”ga bildirishicha, marhumaga homiladorlik paytida muolajalar belgilagan, ayolga homiladorlik o‘ttiz hafta, siydik yo‘li infeksiyasi va o‘tkir yog‘li gepatoz tashxisi qo‘yilgan.
15-noyabr kuni ayol oilaviy shifokor qabuliga kelgan. “Yangiobod” mahalla fuqarolar yig‘inida oilaviy shifokor homilador ayolni ko‘rib, unga siydik yo‘li infeksiyasi tashxisini qo‘yib, homiladorlik patologiyasi bo‘limiga davolanishga yuborgan. Homilador ayol ertasi kuni tug‘ruqxonaga kelib, shifokorga “men shifoxonada yotolmayman, oilaviy sabablar tufayli uyimda davolanishga yozib bering”, deb uyiga davolanish uchun muolaja olishga harakat qilgan, deydi mas’ul.
Mas’ulning bildirishicha, homilador ayol 20-noyabr kuni ertalabki to‘rtga yaqin ko‘ngil aynishi va qayt qilish shikoyatlari bilan olib kelingan.
17-noyabr kuni ayol shifoxonaga tug‘ruq bo‘limiga va homiladorlar patologiyasi bo‘limiga kelgan. Muolajalari belgilangan, lekin kun davomida ayol oilaviy sharoitining og‘irligini, qaynonasi betobligini va u agar shifoxonada yotsa, oilasiga zarar yetishi mumkinligini vaj qilib, tilxat yozib, shifoxonadan chiqib ketgan. 20-noyabr kuni esa soat ertalabki to‘rtga yaqin ko‘ngil aynishi va qayt qilish shikoyatlari bilan olib kelingan. Navbatchi shifokor qabul qilib, muolajalar belgilagan. Ayolga homiladorlik o‘ttiz hafta, siydik yo‘li infeksiyasi va o‘tkir yog‘li gepatos tashxisi qo‘yilgan. Shu kuni soat 14:55 da ayolning ahvoli birdan yomonlashgan. Barcha shifokorlar yig‘ilgan.
Ayolning ahvoli yomonlashgani tufayli favqulodda vaziyat deya kesarcha kesish amaliyotiga olishgan. Undan avval viloyat Perinatal markazi direktor o‘rinbosariga mana shunaqa og‘ir ahvoldagi ayol borligi to‘g‘risida xabar berilgan. Ko‘rsatilgan yordamga qaramay ayolda 17:50 da o‘lim holati qayd qilingan. Shundan so‘ng qarindoshlariga xabar berilgan. Bosh shifokor, reanimatolog, infeksionist va akusher-ginekolog ayolning yaqinlariga xabar bergan, deydi Bo‘ka tuman tibbiyot birlashmasi boshlig‘ining onalik va bolalikni muhofaza qilish masalalari bo‘yicha bosh shifokor o‘rinbosari Marhabo Abdulazizova.
Bo‘ka tuman tibbiyot birlashmasi boshlig‘i vazifasini bajaruvchi Shahboz Rustamovning jurnalistga bildirishicha, homilador ayolning noto‘g‘ri ukol qilinishi oqibatida vafot etganini aynan ayolga qaragan shifokor inkor etgan. Bosh shifokor marhuma o‘limida shifokorlarning aybi yo‘q deb hisoblaydi.
Bemor qarovsiz qolib ketganda shifokorlar aybdor desak bo‘lardi. Bu holatda shifokorlar e’tiborsizlik qilmagan, deydi tuman bosh shifokori.
Bo‘kaliklar tumanda malakali shifokorlar kamligini, homilador qizlarini tuman shifoxonasiga olib borishdan qo‘rqishlarini ta’kidlagan.
Izoh (0)