Toshkent shahrining Mirobod tumanida ona-bola vafot etgani haqida xabar berilgan edi. “Zamon” dasturida mazkur holat yuzasidan qo‘shimcha maʼlumotlar berildi.
Maʼlum qilinishicha, 7-aprel kuni soat 21:15 da Mirobod tumanida joylashgan uyning birida 25 yoshli ayol va uning 8 oylik o‘g‘li vafot etgani aniqlangan. Marhumlarning o‘limi sababini aniqlash maqsadida sud-tibbiy ekspertizasi tayinlangan.
Ayol qizlik uyida ikki nafar farzandi bilan yashagan. Marhumaning yaqinlaridan birining so‘zlariga ko‘ra, o‘sha kuni ayol dugonalari bilan uchrashib, soat 18:00 larda qaytgan.
“Dam olgani yotgan. Gaz mo‘ridan ko‘tarilib uyga urib yuborgan. Bular uxlab qolib bilmay qolgan. Singlisi to‘ng‘ich o‘g‘lini yoniga olib kirganida uyg‘onmagan. Qarasa joni uzilgan ekan. Boshqa oila aʼzolariga zarar yetmagan, ular boshqa xonada bo‘lgan”, — deydi marhumaning tanishi.
Shuningdek, ushbu voqeadan so‘ng xonadon egalari tomonidan tuman tez tibbiy yordam xizmatiga murojaat kelib tushgan. Tez yordam xodimining taʼkidlashicha, ular yetib borganda marhumaning joni uzilganiga taxminan uch soat bo‘lgan.
“Bu yerga 21:30 da yetib keldik. Uyning podvaliga tushsak, ona-bola jonsiz yotgan holatiga duch keldik. Onada ham bolada ham tiriklik belgilari yo‘q edi. Ayolning yaqin kishisi ukasi ekan. Undan surishtirganimizda opasi besh yildan buyon narkologiyada ro‘yxatda turar ekan. Biz kirganimizda eshiklar ochiq edi. Is gazini sezmadik. Bunaqa holatda og‘iz atrofidan ko‘piklar kelib turishi mumkin. Lekin biz unday holatlarni sezmadik”, — deydi xodim.
Shahar FVB hozirda holat yuzasidan maʼlumot bera olmasligi, holatga ovqatdan zaharlanish sabab bo‘lgan bo‘lishi ham mumkinligi aytib o‘tildi. Shu mazmundagi murojaat sanitariya epidemiologik osoyishtalik va jamoat salomatligi qo‘mitasi Toshkent shahar boshqarmasi hamda tuman bo‘limlariga kelib tushmagan. Bu kabi taxminlar hech qanday asosga ega emas.
Hozirda tergovga qadar tekshiruv harakatlari olib borilmoqda.
Izoh (1)
Нима ёзганларингни узларинг хам билмайсилар,натижа нима булли ?