Xitoyda ayol 11 yashar qizni 27 yoshli o‘g‘liga “ideal” rafiqa qilib tarbiyalash maqsadida o‘g‘irlab ketdi. Bu haqda South China Morning Post xabar berdi.
O‘g‘rilik Guychjou provinsiyasi Lyupanshuy okrugidagi qishloqlardan birida sodir bo‘lgan. Ayol jabrlanuvchiga ideal kelin sifatida qaragan va uning otasiga bu borada murojaat qilgan. Biroq taklif rad etilgach, qiz uyda yolg‘iz qolganida ayol uni o‘g‘irlab ketgan.
Voqea 2023-yilda sodir bo‘lgan, ammo ommaga endi e’lon qilinmoqda. O‘g‘rilikdan so‘ng ayol hibsga olingan, bir necha kundan keyin uning o‘g‘li ham politsiyaga taslim bo‘lgan. Qiz to‘rt kun birovning uyida yashagan. 15-dekabr kuni sud ayol va o‘g‘lini bola o‘g‘irlaganlikda ayblab, ikki yil-u yetti oyga ozodlikdan mahrum qilgan.
Bu holat internetda bahs-munozaralarga sabab bo‘lgan. Ijtimoiy tarmoq foydalanuvchilari jazoning “yumshoqligi” va bunday nikohga kirishning ma’naviy oqibatlaridan g‘azablangan.
Xitoyda ota-onalar o‘smir qizlarni asrab olib, ularni o‘g‘illariga bo‘lajak xotin qilib tarbiyalash an’anasi bo‘lgan, deb yozadi South China Morning Post.
1950-yillarda bunday urf-odatlar taqiqlangan, ammo qishloq joylarda ularga rioya qilish davom etmoqda. Misol uchun, Xitoyning janubi-g‘arbiy qismida 1990-yilda tug‘ilgan qiz o‘g‘irlab ketilib, keyin besh yoshida 2,5 ming yuanga (4 million 300 so‘mdan ziyod) sotilgan. Xaridor mamlakat shimolidan kelgan erkak bo‘lgan.
2023-yilda uni o‘g‘irlab sotgan erkak sudlanib, o‘limga hukm qilingan. Global Times nashrining yozishicha, jabrlanuvchi butun umri davomida uyiga qaytish umidida yashagan. 2021-yilda u qarindoshlarini topishga muvaffaq bo‘lgan.
Izoh (0)