“Nadomat” loyihasining navbatdagi qahramoni asli vodiylik bo‘lib, ayni damda Zangiota tumanidagi 42-sonli manzil koloniyasida jazo muddatini o‘tamoqda.
Mahkuma 34 yoshda, u Jinoyat kodeksining 168 va 273-moddalari bilan aybdor deb topilib, olti yil-u yetti oyga ozodlikdan mahrum etilgan.
U giyohvand moddalarni sotish va firibgarlik jinoyatlarini sodir etgan.
— Oilada to‘rtinchi qiz farzandman. Dadam rahmatli o‘g‘il bola bo‘lib tug‘ilishimni juda istagan ekan. Ammo biror marta bizga o‘g‘il bola emasligimizdan afsuslanishi haqida aytmagan. Bolaligim juda chiroyli o‘tgan, maktabdagi eng aʼlochi o‘quvchilardan biri edim. 10 yoshimda dadamning yuragi xuruj qilib vafot etdi, ana shundan keyin hayotimiz o‘zgarib ketdi. Onam o‘sha kungacha hech qayerda ishlamasdi, faqatgina katta opam turmushga chiqqan, keyingi opalarimga ham sovchilar kelib turgandim. Ikkinchi opamni turmushga bergandan keyin katta qarz bo‘lib qoldik. Onam Rossiyaga ishlagani ketishga majbur bo‘ldi va men yolg‘iz qolib ketdim. Tarbiyam bilan shug‘ullanadigan odam bo‘lmadi.
Yuqori sinfda o‘qiyotganimda sinfdoshimga ko‘ngil qo‘ydim. Oila qurishimizga ikkimizning oila aʼzolarimiz ham qarshilik qilishdi. Shunday yo‘l tutdikki, keyinchalik to‘yga rozi bo‘lishlariga majbur qildik.
Fotihamiz bo‘ldi, u to‘ydan keyin alohida yashashimiz uchun uy sotib olgandi. Men o‘qirdim, u esa rasmiy daromadga ega emasdi. Uyni taʼmirlatish uchun mablag‘ kerak bo‘lganida “Seni tanishlaringning nomiga kredit olaylik, kunlik ishda ishlab tezda uzilaman”, dedi. Gaplariga ishonib uchta tanishimning nomiga kredit rasmiylashtirib oldik. Uch oy to‘ladi, ammo keyin har xil bahonalar qila boshladi. Bu vaqtda onam Rossiyada edi, mahalla noziri chaqirib “Bu haqda onangga aytish kerak”, dedi. Onamga aytmasligi uchun boshqa birovlardan qarz olib berdim, ammo ko‘p o‘tmay ular ham so‘radi. Xullas, “qarz qalpog‘i” yopilmadi va o‘rtada mahalla noziri bilan ham jiddiy kelishmovchilikka borib, to‘yimga 20 kun qolganida qamaldim.
Eng alam qilgani ahd-paymon qilgan insonim sudga borganda “Menga sudlangan qiz ayollik qilolmaydi”, dedi. Keyinchalik sarpo uchun olingan narsalarni sotib, qarzning bir qismini uzishganini eshitdim. Ammo unda imkoniyat bor edi, hech bo‘lmaganda uyni sotib, bir qismi bilan ham qarzni yopsa bo‘lardi, ammo u bunday qilishni istamadi. 19 yoshimda qamaldim va jazo muddatimni o‘tab chiqqandan keyin unga qo‘ng‘iroq qildim. “Menga boshqa qo‘ng‘iroq qilma, uylanyapman”, degan javobni oldim.
Undan keyin yaxshi inson bilan oila qurdim, ketma-ket farzandli bo‘ldik. Ammo kutilmaganda kenja farzandim bosh miya bilan bog‘liq kasallikka chalindi. Uni davolatish uchun jinoyat qilishga majbur bo‘ldim. To‘g‘ri, buni qoralarsiz, ammo men ona sifatida shunday qilishga majbur bo‘ldim. Orada otasining oila aʼzolari sabab turmushimiz buzildi, qo‘limda ikkita bola, biri og‘ir kasal.
Tanishlarimdan biri giyohvand moddani bir manzildan boshqasiga olib borsam, 1000 dollar berishini aytdi. Rozi bo‘ldim, undan keyin odamlardan qarz olib, uni qaytarib berolmadim. Chunki o‘sha vaziyatda ikki yoshli bolamni davolatish uchun har qanday ishga tayyor edim.
Hozir ko‘p o‘ylayman, bolamni o‘ylabman-u, ammo men ham bir onaning farzandi ekanligimni unutibman. Onam hozir 70 yoshda, har oy meni ko‘rgani keladi. O‘g‘lim uch yoshida qamalgandim, hozir 6 yarim yoshga to‘ldi. Har gal qo‘ng‘iroq qilganida “Rossiyadan qachon qaytasiz? Boshqa u yerlarga ishlagani bormang”, deydi. U qamoqxonada ekanligimni biladi, ammo aytolmaydi. Balki aytishni istamas, or qilar.
Odamning boshiga ish tushganida yo zalolat yoki hidoyat yo‘liga kirar ekan. Men, afsuski, qiyinchiliklarga osongina taslim bo‘ldim. Giyohvand moddalarni yashirincha tashiyotganda u xuddi mendek qanchadan qancha onalarni farzandidan ajratishi haqida o‘ylab ko‘rmabman. Hozir shu kunlarni eslab ko‘p afsuslanaman, — deydi mahkuma.
Loyihani YouTube’dagi “Daryo media” kanalida kuzatib borishingiz mumkin.
Izoh (0)