АҚШ президенти Дональд Трамп “Тиме” журнали билан суҳбатда Гренландияни сотиб олиш, Канадани АҚШнинг 51-штатига айлантириш ва Панама канали устидан назорат ўрнатиш ҳақидаги гаплари ҳазил эмаслигини таъкидлади.
“Аслида йўқ, мен ҳазиллашмаяпман”, деди АҚШ президенти шу ҳақдаги саволга жавобан.
Бундан ташқари, Трамп Гренландияни қўшиб олиш масаласи Қўшма Штатлар учун геосиёсий аҳамиятга эга эканлигини ва хавфсизлик манфаатларига мос келишини таъкидлади.
“Менимча, бу Гренландия учун жуда яхши имконият бўларди... Бу биз учун миллий ва халқаро хавфсизлик нуқтайи назаридан ҳам муҳим. Сиз буни “троллинг бўлиши мумкин” дедингиз, аммо аслида мен троллинг қилмаяпман”, - дея қўшимча қилди у.
Илгари Bloomberg агентлиги Трамп Гренландияни сотиб ололмаслигини, чунки тўлаши керак бўлган нарх жуда юқори эканлигини хабар қилганди. Нашр муаллифларининг таъкидлашича, агар Арктика оролининг 57 минг аҳолисининг ҳар бирига АҚШ таркибига қўшилиш учун овоз бериш эвазига бир миллион доллар ва Трампнинг "олтин картаси" таклиф қилинса, бу АҚШ бюджетига триллионлаб долларга тушади - Конгресс бундай мақсадлар учун маблағ ажратишдан деярли аниқ бош тортади.
Трамп илгари Гренландия унинг мамлакатига қўшилиши кераклигини бир неча бор айтган эди. У агар Дания оролдан воз кечмаса, унга қарши юқори савдо божларини жорий қилиш билан таҳдид қилди. Трамп биринчи президентлик муддатидаёқ Гренландияни сотиб олишни таклиф қилганди. Дания ва Гренландия ҳукуматлари бу ғояни қатъиян рад этиб келмоқда.
Гренландия автоном ҳудуд сифатида Дания таркибига киради. 1951 йилда Вашингтон ва Копенгаген НАТО бўйича иттифоқчилик мажбуриятларига қўшимча равишда Гренландияни ҳимоя қилиш тўғрисидаги шартномани имзолади. Унга кўра, АҚШ оролни ташқи тажовуздан ҳимоя қилиш мажбуриятини олди. Оролда Американинг Питуффик космик базаси жойлашган бўлиб, у ракета ҳужумидан огоҳлантириш ва Арктика ҳудудини назорат қилиш тизими вазифаларини бажаради.
Изоҳ (0)