АҚШда 5 апрель куни мамлакат президенти Дональд Трампнинг сиёсатига қарши оммавий норозилик намойишлари бўлиб ўтди. Бу ҳақда CNN хабар берди.
“Қўлингни торт” деб номланган кампания 50 штатни қамраб олди ва Трамп инаугурациясидан бери энг йириги бўлди. АҚШда жами 1400 та акция бўлиб ўтди. Уларнинг энг йириклари Нью Йорк, Чикаго, Бостон, Лос-Анжелес ва Вашингтонда кузатилди. Ташкилотчилар маълумотларига кўра, 600 мингга яқин одам намойишларда иштирок этиш ниятини тасдиқлаган. Аммо кўчага чиққанларнинг аниқ сонини ҳисоблаш имконсиз.
Фаоллар “коррупцияга ва миллиардерларнинг ҳокимиятни қўлга олишига барҳам бериш”ни талаб қилиб, Илон Маскнинг ваколатлари ва ҳаракатларидан, хусусан, давлат хизматчиларини оммавий ишдан бўшатишидан норозилик билдирган. Шунингдек, улар ижтимоий дастурларни молиялаштиришни қисқартиришга қарши чиққан ҳамда муҳожирлар, трансгендерлар ва бошқа ҳимоясиз жамият аъзоларига нисбатан бўлаётган ҳужумларни қаттиқ қоралаган.
Биз миллий инқирозга дуч келдик. Трамп ва Маск ҳокимиятни ғайриқонуний равишда эгаллаб олаётган бир пайтда, демократиямиз, турмуш тарзимиз ва ҳуқуқларимиз хавф остида қолмоқда. Бу шунчаки коррупция эмас. Бу оддий бошбошдоқлик ҳам эмас. Бу душманона эгаллаб олишдир, дея таъкидлади ташкилотчилар.
Трампга импичмент эълон қилишмоқчи
Ўз навбатида, конгрессмен-демократ Эл Грин Вашингтондаги митингда 30 кун ичида Трампга импичмент эълон қилиш тўғрисида даъво аризаси киритишини, чунки у АҚШ президентининг ишончи ва лавозимига “лойиқ эмас”лигини айтди.
Норозилик намойишларидан бир кун олдин собиқ президент Барак Обама ва республикачининг сайловдаги рақиби Камала Харрис Трампни очиқчасига танқид қилди. Одамлар нафақат АҚШда, балки Канада, Мексика, Германия, Франция ва Буюк Британияда ҳам Трамп бошлаган савдо урушидан норози бўлиб намойишга чиқди.
Трампнинг савдо сиёсати
2 апрель куни АҚШ раҳбари дунё товарларига божлар жорий қилди. Ўзбекистон маҳсулотларига ҳам 10 фоизлик бож солинмоқда. Баъзи мамлакатларга нисбатан божлар миқдори эса 50 фоизга етган.
Бу АҚШнинг ҳаракатлари жаҳон иқтисодиёти секинлашишига сабаб бўлиши мумкинлиги ҳақидаги хавотирларни келтириб чиқарди. Натижада, инвесторлар хавфсиз ҳисобланган активларга, жумладан, олтинга йўналишди. Бу эса қимматбаҳо металл нархининг кўтарилишига олиб келди. 3 апрель куни тарихда илк бор олтин нархи бир унсия учун 3200 доллардан ошди. Хитой божларга жавобан Америка товарларига 34 фоизлик тарифлар белгилади.
Изоҳ (0)