Гренландияликлар АҚШ президенти Дональд Трампнинг оролни қўшиб олиш ҳақидаги баёнотларига норозилик билдириш мақсадида Америка маҳсулотларини бойкот қилишни бошлади. Бу ҳақда KNR маҳаллий радиостанцияси хабар қилмоқда.
Радиостанция маълумотларига кўра, Facebook ижтимоий тармоғида “Гренландияда Америка товарларини бойкот қилинг” номли гуруҳ очилган бўлиб, унга 4 мартдан бери 1700 дан ортиқ киши аъзо бўлган. “АҚШ товарларини бойкот қилинг” деб номланган Дания гуруҳи эса аллақачон 89 мингдан зиёд аъзога эга.
“Биз Америка маъмуриятига ҳозирги вазиятдан мамнун эмаслигимизни кўрсатишимиз зарур. Шунингдек, Дональд Трампнинг баёнотларига қарши норозилигимизни билдириш лозим”, дейди гуруҳлардан бирининг асосчиси, гренландиялик Миник Ланген.
Лангенинг айтишича, орол аҳолисининг Америка маҳсулотларини сотиб олишдан воз кечиши “сокин норозилик”ка айланиши мумкин. Гуруҳ асосчиси кўпроқ Европа ёки Канада маҳсулотларини харид қилишни таклиф этмоқда.
Февраль ойининг охирида Гуардиан газетаси хабар қилишича, канадаликлар Вашингтон томонидан жорий этилаётган божлар ва Америка раҳбари Дональд Трампнинг Канадани АҚШнинг 51-штатига айлантириш таҳдидлари сабабли Америка маҳсулотларини бойкот қилишни бошлаган.
11 март куни Гренландияда парламент сайловлари бўлиб ўтди. Энди депутатларнинг янги таркиби Даниядан мустақиллик бўйича референдум ўтказиш масаласини ҳал қилиши мумкин. Бу масала Трампнинг оролни АҚШга қўшиб олиш истаги ҳақидаги баёнотларидан сўнг кўтарилди. Гренландиядаги биронта сиёсий партия ҳам, аҳолининг мутлақ кўпчилиги ҳам АҚШга қўшилишни қўллаб-қувватламайди. Аксинча, барча сиёсатчилар қатъий мустақиллик тарафдори: на Дания, на АҚШ.
Март ойида АҚШ президенти Дональд Трамп Гренландия “барибир” АҚШ назоратига ўтишини айтди ва орол аҳолиси Қўшма Штатларга қўшилса, бойиб кетишини ваъда қилди.
Маълумот учун, Гренландия 1953 йилгача Даниянинг мустамлакаси бўлган. У ҳамон қиролликнинг бир қисми ҳисобланади, бироқ 2009 йилда ўзини ўзи бошқариш ва ички сиёсатда мустақил қарор қабул қилиш ҳуқуқи билан автономия олган.
Изоҳ (0)