Дональд Трампнинг Оқ уйга қайтиши муносабати билан АҚШ ва Хитой ўртасидаги муносабатларнинг кескинлашуви фонида Хитой компаниялари Америка суюлтирилган табиий газини (SТG) харид қилишни тўхтатди. Бу ҳақда Financial Times хабар бермоқда.
АҚШ суюлтирилган гази юкланган сўнгги танкер 6 февраль куни Хитой портига етиб келган. 10 февралгача (АҚШдан газ импорти учун 15 фоизлик божлар кучга кирган сана) юкни туширишга улгурмаган яна бир танкер Бангладешга йўналтирилган. Ўша пайтда ХХР божлари 49 фоизга етгани сабабли АҚШдан газ сотиб олиш хитойлик истеъмолчилар учун фойдасиз бўлиб қолди.
Ўтган йил якунларига кўра, Хитой импортида АҚШ суюлтирилган гази улуши атиги олти фоизни ташкил этгани боис бу йўқотишлар ҳар икки томон учун ҳам жиддий зарба бўлмади. Бундан ташқари, Трампнинг аввалги президентлик муддати давомида Хитой АҚШдан газ импортини бир йилдан ортиқ вақтга тўхтатиб қўйган эди.
Шунга қарамай, бу сафар чекловлар янада жиддийроқ оқибатларга олиб келиши мумкинлигини мутахассислар таъкидламоқда. Kpler маълумотларига кўра, Хитойнинг PetroChina ва Sinopec компаниялари АҚШда суюлтирилган газ сотиб олиш бўйича 13 та узоқ муддатли шартномага эга бўлиб, улар доирасида АҚШ ва Мексикада терминалларни кенгайтириш лойиҳалари ишлаб чиқилган. ХХР компанияларининг бу талабдан воз кечиши уларнинг иқтисодиётига салбий таъсир кўрсатиши мумкин.
Бундан ташқари, Energy Aspects энергетика маслаҳат компанияси вакили Ричард Бронзнинг огоҳлантиришича, ҳозирда Хитой бу йўналишда сезиларли қадамлар қўймаётган бўлса-да, бундай вазият Пекин ва Москва ўртасидаги энергетика алоқаларини мустаҳкамлашга хизмат қилиши мумкин.
Таъкидланишича, Трампнинг АҚШ президенти лавозимига келиши билан Хитойга Америка нефтини етказиб бериш ўн баробарга қисқарган, эндиликда Канада бу йўналишда икки баробар кўпроқ хом ашё экспорт қилмоқда.
Трампнинг савдо уруши
2 апрель куни АҚШ президенти Дональд Трамп барча давлатлар учун 10 фоизлик асосий тарифларни жорий қилди. Улар қаторида Ўзбекистон ҳам бор. Аммо божлар ҳар бир давлатнинг савдо балансига қараб ўзгарди. Хитой билан савдода йирик дефицит мавжудлиги боис АҚШ бу мамлакат учун тарифларни анча юқори даражага кўтариб, 34 фоизга етказди.
Бунга жавобан Пекин ҳам шунча миқдорда Америка товарларига божлар солди. Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилди. Шу сабабли божлар 104 фоизга ошди.
Натижада Хитой Америка маҳсулотлари учун божларни 84 фоизга оширишини эълон қилди. Мазкур эълон ортидан Трамп Пекин учун тарифлар 125 фоизга чиқишини айтди, кейинчалик буни 145 фоизга оширди. Хитой мазкур тарифларга жавобан ставкани 125 фоизга кўтарди. Оқ уй мазкур ҳаракатни “қасоскорона чоралар” деб атаб, Хитойдан олиб келинадиган маҳсулотларга бож тарифлари 245 фоизгача кўтарилишини билдирди.
Хитой АҚШни “ўзаро божлар”ни бекор қилишга ва ўзининг нотўғри амалиётини тузатишга чақирди. ХХР раиси Си Цзиньпин ҳеч бир давлат “бож уруши”дан ютмаслигини қайд этди.
Изоҳ (0)