Канаданинг янги бош вазири Марк Карни ўз мамлакати ҳеч қачон Қўшма Штатлар таркибига кирмаслигини яна бир бор таъкидлади. Бу ҳақда у қасамёд қабул қилиш маросимида айтиб ўтди, деб хабар бермоқда Тhе Globe аnd Mail нашри.
“Биз ҳеч қачон, ҳеч қандай шароитда Қўшма Штатларнинг бир қисми бўлмаймиз. Канада Америка эмас”, деди Карни. “Биз тубдан бошқа мамлакатмиз”, дея қўшимча қилди у.
Марк Карни 2025 йил январида истеъфога чиқишини эълон қилган Жастин Трюдо ўрнига бош вазир бўлди. Жастин Трюдо сиёсий ҳаракат унга ўринбосар топиши биланоқ вазифасини тарк этишини айтганди.
Жастин Трюдо 2013 йилдан бери партияга раҳбарлик қилиб келган, 2015 йилда эса бош вазир лавозимини эгаллаганди.
Марк Карни Дональд Трамп томонидан импортга 25 фоизлик божхона тўловлари киритилиши ва АҚШ президентининг Канада суверенитетига дахл қилиши шароитида АҚШ билан савдода қарамликни камайтириш мақсадида Европа ва Осиё билан яқин ҳамкорлик тарафдори.
Бундан ташқари, у ўрта синф учун солиқларни камайтириш, бюрократияни қисқартириш ва инновациялар ва инвестицияларни фаол рағбатлантиришни ўз ичига олган фундаментал иқтисодий ислоҳотларни амалга оширишни ваъда қилмоқда.
Изоҳ (0)