АҚШ президенти Дональд Трамп автомобиллар импортига 25 фоизлик божлар жорий этилишини маълум қилди. Бу ҳақда Bloomberg хабар берди.
Гап АҚШда ишлаб чиқарилмайдиган барча машиналар ҳақида кетмоқда. Тарифлар 2 апрелдан кучга киради. Бу АҚШга йилига 100 миллиард доллар даромад келтириши кутилмоқда. Трампнинг қарори фонида General Motors Cо. ва Ford Motor Cо. акциялари 5 фоиздан кўпроққа арзонлашди.
Президент янги божлар бўйича автомобиль ишлаб чиқарувчиларнинг “катта учлиги” — Ford, General Motors ва Stellantis вакиллари билан музокара ўтказганини айтди.
Агар бу ерда заводларингиз бўлмаса, уларни қуришингизга тўғри келади, акс ҳолда улар бож тўлашига тўғри келади, ҳаммаси жуда оддий, деди у.
Трампнинг сўзларига кўра, “катта учлик”нинг аксарият компаниялари аллақачон Қўшма Штатларда заводларга эга ва, шунингдек, эҳтиёт қисмларни ишлаб чиқариш бўлинмаларини АҚШга кўчирмоқчи.
Оқ уй матбуот котибининг биринчи ўринбосари Ҳаррисон Филдснинг аниқлик киритишича, 25 фоизлик божлар қуйидагиларга татбиқ этилади: импорт қилинадиган енгил автомобиллар (седанлар, йўлтанламаслар, кроссоверлар, минивенлар ва фургонлар), енгил юк машиналари, двигателлар ва электр компонентлар каби асосий автомобиль қисмлари.
Канада бош вазири Марк Карни АҚШ президенти қарорини “тўғридан тўғри ҳужум” деб атади. Унинг сўзларига кўра, Оттава жавоб вариантларини, жумладан, эҳтимолий божларни кўриб чиқади.
Еврокомиссия раҳбари Урсула фон дер Ляйен янги тарифлардан афсусда эканини билдирди.
Европа иттифоқи ўз иқтисодий манфаатларини ҳимоя қилган ҳолда музокаралар йўли билан ечим излашда давом этади, деди у.
Март ойида Трамп Мексика ва Канададан импорт учун 25 фоизлик божларни жорий қилди, аммо уларни эркин савдо шартномаси (USMCА) доирасидаги товарлар, жумладан, автомобиллар ва эҳтиёт қисмлар учун бир ойга кечиктирганди.
Изоҳ (0)