Халқаро валюта жамғармаси (ХВЖ) АҚШ президенти Дональд Трамп маъмурияти томонидан жорий этилаётган божхона тўловларининг хорижий маҳсулотларга таъсирини баҳоламоқда. Бу ҳақда жамғарма расмий вакили Жули Козак журналистлар учун ўтказилган брифингда маълум қилган.
“Бугунги кунда айтишим мумкинки, сўнгги бир неча ҳафта ичида биз савдо соҳасида бир қанча янги ўзгаришларни кузатдик. Албатта, кеча автомобилсозлик соҳасига тарифлар бўйича баёнот берилди ва АҚШ маъмурияти ҳам келаси ҳафта, 2 апрелда божлар бўйича янги баёнотлар берилишини маълум қилди. Биз ушбу баёнотларнинг таъсирини баҳолаш жараёнидамиз ва бу ишни жаҳон иқтисодиётининг ривожланиш истиқболлари шарҳини тайёрлаш доирасида давом эттирамиз. Бу шарҳ, айтганимдек, апрель ойида эълон қилинади”, деди у.
Козак таъкидлаганидек, Канада ва Мексика товарларига қўйилган Америка божлари, Мексика ва Канадага, шунингдек, бошқа минтақалар ва мамлакатлар гуруҳларига сезиларли салбий таъсир кўрсатиши мумкин.
“Биз ҳозирда ушбу таҳлилни ўтказмоқдамиз. Бу жараён давомида барча эълонлар, иқтисодий ўзгаришлар ва маълумотларни кўриб чиқамиз”, дея таъкидлади у.
ХВЖ расмий вакили қўшимча қилишича, жамғарма “маълум бир вақтда Америка божлари бўйича янги маълумотларни ҳисобга олмайдиган санани белгилайди” ва мавжуд маълумотларни таҳлил қилишга эътибор қаратади.
26 март куни Трамп АҚШ ҳудудидан ташқарида ишлаб чиқарилган барча автомобиллар учун импорт божларини 25 фоиз миқдорида жорий этишини маълум қилди. Илгари амал қилган 2,5% миқдоридаги божлар ҳам сақланиб қолиши керак, натижада янги тариф ставкаси 27,5% ни ташкил этади.
Politico газетасининг баҳолашича, Трамп эълон қилган автомобиллар импортига божлар Европа автомобиль саноатини ҳалокат ёқасига келтириши мумкин. Улар аллақачон паст сотувлар ва арзонроқ Хитой автомобиллари билан рақобат фонида инқирозга юз тутаётган Европа Иттифоқи автомобиль саноатига жиддий зарба бериши мумкин.
Изоҳ (0)