Америка Қўшма Штатлари президенти Дональд Трамп АҚШнинг Яқин Шарқда юзага келиши мумкин бўлган янги узоқ ёки қисқа муддатли қуролли можарога аралашишини истамаслигини билдирди.
Шунингдек, у Оқ уйда журналистлар билан суҳбатда Исроилнинг Эронга қарши ҳарбий операциясига изоҳ берар экан, АҚШ яҳудий давлатига турли йўналишларда ёрдам кўрсатаётганини таъкидлаган.
“Биз узоқ муддатли кампанияга интилмаяпмиз. Мен фақат битта нарсани хоҳлайман: Эрон ядро қуролини қўлга кирита олмаслиги керак. Мен буни 20 йилдан бери айтиб келмоқдаман. Гап шунда”, деди Трамп.
Унинг фикрича, агар Эрон ядро қуролини яратса, уни америкаликлар ва “бошқа инсонларга” қарши ишлатади, бу эса бутун дунёда даҳшат уйғотади.
“Бу бошқа нарсанинг масаласи эмас”, дея таъкидлади у.
Шу билан бирга, Трамп асосан АҚШдаги сайловчиларни назарда тутиб, “баъзи одамлар” Америка томонининг Исроилга Эронга қарши операция ўтказишда кўрсатаётган ёрдамидан норози эканлигини тан олган.
“Аммо жуда мамнун бўлганлар ҳам бор”, дея қўшимча қилган АҚШ президенти.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)