Исроил ва АҚШ Эроннинг ядровий интилишлари ва Яқин Шарқдаги “агрессив ҳаракатлари”га қарши турмоқчи. Бу ҳақда Исроил бош вазири Биньямин Нетаньяху АҚШ Давлат котиби Марко Рубио билан учрашувдан сўнг маълум қилди.
Рубио лавозимга киргандан бери илк бор Исроилга ташриф буюрди. Нетаньяхунинг айтишича, у билан бир қатор масалаларни муҳокама қилган, “уларнинг ҳеч бири Эрондан муҳимроқ бўлмаган”.
Эрон “ядро қуролига эга бўлмаслиги керак”
Биз оятуллоҳларда ядро қуроли бўлмаслиги, Эроннинг минтақадаги тажовузкор ҳаракатлари тўхтатилиши кераклиги ҳақида келишдик, деди Исроил бош вазири.
Рубио эса Эрон минтақадаги “ҳар бир террорчи гуруҳ ортида” турганини, “бу ҳудудни ўз уйи деб биладиган миллионлаб одамлар учун тинчлик ва барқарорликка таҳдид солиши”ни таъкидлади. Нетаньяху “президент Трампнинг кучли раҳбарлиги остида“ Исроил Эронга қарши “ишни якунлашига” ишонч билдирди. Шунингдек, у Трампни “Исроилнинг Оқ уйдаги энг катта дўсти” деб атади.
Рубио: АҚШ Сурия вазиятини диққат билан кузатиб боради
АҚШ давлат котиби Суриядаги сиёсий вазият ҳақида фикр билдирар экан, Башар Асад тузумининг қулашини “истиқболли” деб баҳолади, бироқ шу билан бирга “бир беқарорлаштирувчи кучнинг бошқаси билан алмаштирилиши ижобий ҳодиса эмаслигини” таъкидлаб ўтди.
Бу вазиятни биз жуда синчковлик билан кузатиб борамиз, деди Рубио.
Ўз навбатида, Нетаньяху “бошқа душман кучларга”, аввало Эронни назарда тутган ҳолда, Суриядан “Исроилга қарши амалиётлар учун таянч нуқтаси” сифатида фойдаланишга йўл қўймаслигини айтди. У Исроил мудофаа қўшинлари Суриядаги нишонларга “юзлаб зарбалар” берганини эслатиб ўтди.
Ғазо сектори бўйича “Қўшма стратегия”
Бундан ташқари, Нетаньяху Ғазо сектори бўйича икки давлатнинг “қўшма стратегияси”ни эълон қилди.
Биз Трампнинг Ғазо сектори келажаги ҳақидаги дадил қарашларини муҳокама қилдик ва бу қарашни амалга ошириш устида ишлаймиз, деди у.
Аввалроқ Трамп Ғазо секторининг барча аҳолисини кўчириш ва бу ҳудудни АҚШ назоратига олиш, уни “Яқин Шарқ дарёси”га айлантириш ниятида эканини айтганди.
Марко Рубио эса ҲАМАСни йўқ қилишга чақириб, бу ташкилот “ҳарбий ёки ҳукумат кучи сифатида мавжуд бўла олмаслигини” таъкидлади.
Изоҳ (0)