Исроил бош вазири Биньямин Нетаньяху Эрон олий раҳнамоси Хоманаийнинг ўлдирилиши мамлакат билан зиддиятга чек қўйишини айтди. Бу ҳақда Deutsche Welle хабар берди.
Нетаньяхунинг айтишича, Ислом республикаси “Яқин Шарқдаги барчага даҳшат солмоқда ва дунёни ядро уруши ёқасига олиб келмоқда”. Исроил эса “ёвузлик кучларига қарши туриш орқали бу тажовузга чек қўйиш ниятида”.
“Агар Эроннинг олий раҳнамоси Оятуллоҳ Али Хоманаий ўлдирилса, бу Ислом Республикаси ва Исроил ўртасидаги можарони кучайтирмайди, балки можарога чек қўяди”, деди Исроил бош вазири Биньямин Нетаньяху 16 июнь куни.
“Бизнинг орамизда Яқин Шарқдаги барчани даҳшатга солаётган ярим асрлик можаро бор. У Саудия Арабистонидаги Aramco нефть конларини бомбардимон қилди; у ҳамма жойда терроризм, қўпорувчилик ва саботаж тарқатмоқда. Эрон абадий урушни истайди, бу бизни ядро уруши ёқасига олиб келади. Аслида, Исроил бунга йўл қўймаяпти, бу тажовузга чек қўймоқда ва биз буни фақат ёвуз кучларга қарши туриш орқали амалга оширишимиз мумкин”, дея қўшимча қилган Нетаньяху.
Исроил ҳақиқатан ҳам Хоманаийни нишонга оладими, деган саволга Нетаньяху мамлакат “қилиш керак бўлган ишни қилаётгани”ни айтган.
Олдинроқ, АҚШ президенти Дональд Трамп Исроилнинг Хоманаийни йўқ қилиш режасига вето қўйганди. Эрон Америка фуқароларига тўғридан тўғри ҳужум қилмагунча, Вашингтон бундай чораларни маъқуллашга тайёр эмаслиги билдирилган. Исроил Миллий хавфсизлик кенгаши раҳбари Сзахи Ҳанегби бу хабарни “сохта хабарлар мамлакатидан келган уйдирма” деб атаган.
Таъкидланишича, Хоманаий Исроил ҳарбий амалиёти бошланганидан бир неча соат ўтгач, Теҳрон шимоли-шарқидаги ерости бункерига яширинган. Бошпанада Эрон олий раҳбари билан бирга унинг оила аъзолари ҳам бор. Исроилга қарши аввалги операциялар пайтида — 2024 йил апрель ва октябрь ойларида ҳам Оятуллоҳ ушбу бункерга яширинганди.
Исроил 15 июнь куни Хоманаий ўзини ҳеч қаерда хавфсиз ҳис қила олмаслигини кўрсатиш учун яҳудий давлатидан 2300 км узоқликдаги Машҳад аэропортига зарба берган. Олий раҳнамо девони раҳбари ўринбосари Али Асғар Ҳижозий Россия расмийлари билан вазият янада ёмонлашса, мамлакатни тарк этиш эҳтимоли ҳақида махфий музокаралар олиб бораётгани айтилган. Айтилишича, Эроннинг бошқа юқори мартабали амалдорлари ҳам худди шундай келишувларга эришмоқда.
Изоҳ (0)