АҚШ Эрон ислом республикасининг кузатув ва ҳаво мудофааси воситалари мавжудлигига қарамай, ҳаво ҳудуди устидан тўлиқ назорат ўрнатди. Бу ҳақда АҚШ президенти Дональд Трамп ўзига тегишли Truth Social ижтимоий тармоғида ма`лум қилди.
“Ҳозирда Эрон осмони устидан тўлиқ ва мутлақ назоратга эгамиз. Эронда яхши кузатув ускуналари ва бошқа мудофаа техникаси кўп миқдорда мавжуд эди, аммо булар Америка ишланмалари ва қуроллари олдида ҳеч нарсага арзимайди. Ҳеч ким буни қадимги содиқ Америкадан яхшироқ қила олмайди”, дея ёзган Америка раҳбари.
17 июнь куни кундузи Трамп Эрондан таслим бўлишини кутаётганини эълон қилди. У Эрон ва Исроил ўртасида ўт очишни тўхтатишга интилмаётганини, можаронинг фақат Теҳрон ядровий дастурлардан бутунлай воз кечган тақдирдагина якунланиши мумкинлигини таъкидлади.
Шунингдек, Америка раҳбари журналистлар билан суҳбатда Теҳрон келишув тузиши керак эди, бироқ энди у музокаралар олиб боришга “кайфияти йўқлигини” айтган.
Эрон ва Исроил ўртасидаги зиддият 13 июнь куни кескин тус олди. Ўшанда Исроил армияси Эрон ҳудудини кенг миқёсда ўққа тутиб, Эроннинг ядровий объектлари ва юқори мартабали ҳарбийлар позицияларига зарбалар берган эди. Бунга жавобан Эрон Исроилни ракета ва дронлар билан ўққа тута бошлади.
Бундан олдин, 2025 йил апрель ойидан бошлаб Вашингтон ва Теҳрон Эроннинг ядровий муаммоси бўйича музокаралар олиб борган эди. Америка томони Теҳроннинг яширинча ядро қуролини яратиши мумкинлигини таъкидлаган, аммо Эрон бу айбловларни рад этган. Исроил амалиёти бошланганидан сўнг Маскатда режалаштирилган АҚШ ва Эрон ўртасидаги музокараларнинг янги босқичи бекор қилинди.
Изоҳ (0)