АҚШ президенти Дональд Трамп Канадада ўтказиладиган G7 саммитида Владимир Зеленский билан музокаралар олиб боради. Бу ҳақда Reuters агентлиги Оқ уй ходимига таяниб хабар берди.
Шунингдек, Америка раҳбари G7 доирасида Мексика президенти Клаудия Шейнбаум ва Канада бош вазири Марк Карни билан икки томонлама учрашувлар ўтказиши маълум қилинган.
Трамп 15-17 июнь кунлари Канаданинг Кананаскис курорт ҳудудида (Алберта провинцияси) бўлиб ўтадиган саммитга аллақачон етиб келгани айтилмоқда.
“Катта еттилик” саммити Канаданинг Кананаскис шаҳрида 16-17 июнь кунлари бўлиб ўтмоқда. Тадбирда еттита давлат - Германия, АҚШ, Канада, Буюк Британия, Франция, Италия, Япония, шунингдек, Европа Иттифоқи вакиллари ва таклиф этилган ҳамкор мамлакатлар иштирок этмоқда.
2025 йилда Трамп ва Зеленский икки марта учрашган. Уларнинг биринчи учрашуви 28 февраль куни Оқ уйда Зеленский ерости бойликлари бўйича келишувни имзолаш учун ташриф буюрганда содир бўлган. Бироқ учрашувнинг бошидаёқ президентлар ўртасида журналистлар кўз ўнгида оғзаки тўқнашув юз берди. Шундан сўнг Зеленский Вашингтонни тарк этди, келишув имзоланмади. Трамп эса бир неча кунга Украинага ҳарбий ва разведка ёрдамини тўхтатиб қўйди.
Трамп ва Зеленскийнинг иккинчи учрашуви 26 апрель куни Ватиканда Рим папаси Францискнинг дафн маросимида бўлиб ўтди. Ушбу учрашувда Украина президенти Трампни Россияга нисбатан қатъийроқ позиция эгаллашга ишонтира олди. Шундан сўнг Трамп ҳақиқатан ҳам Москванинг хатти-ҳаракатларини жамоатчилик олдида тез-тез танқид қила бошлади.
Трамп Оқ уйга қайтганидан бери Россия президенти Владимир Путин билан бирор марта ҳам юзма-юз учрашмаган, аммо улар беш марта телефон орқали суҳбатлашган. Охирги марта улар 14 июнь куни мулоқот қилишди. Ўшанда биринчи бор суҳбатнинг асосий мавзуси Россия-Украина уруши эмас, балки Исроилнинг Эронга ҳужуми бўлди.
Изоҳ (0)