Сурия расмийлари Башар Асад давридаёқ жорий этилган санкцияларни бекор қилиш учун Америка компанияларига табиий ресурсларини ўзлаштириш имкониятини беришга тайёр. Бу ҳақда манбаларга таяниб Тhе Times хабар берди.
АҚШ президенти Дональд Трамп Саудия Арабистонида Сурия муваққат президенти Аҳмад аш-Шараъа билан учрашиши мумкин. Манбаларга кўра, Суриянинг янги раҳбари Иброҳим келишувига қўшилиш масаласини муҳокама қилиши мумкин. Мазкур келишув Исроилнинг БАА, Баҳрайн, Марокаш ва Судан каби бир қатор араб давлатлари билан муносабатларини нормаллаштиришга қаратилган. Аҳмад аш-Шараъа Исроилнинг Сурия жануби-ғарбий чегараларида, Голан тепаликлари ҳудудида доимий мавжудлигига рози бўлишга тайёрлиги таъкидланмоқда.
Суриянинг АҚШ билан табиий ресурслардан фойдаланишни ўз ичига олган стратегик ҳамкорликни йўлга қўйиш режалари ҳақидаги маълумотни Reuters ҳам тасдиқлаган. 30 апрель куни аш-Шараъа билан учрашган америкалик бизнесмен Жонатан Басс бу ҳақда маълумот берган. У Суриянинг муваққат президенти “мамлакат келажаги учун” келишувга эришмоқчилигини айтган.
У (аш-Шараъа) Дамашқда Trump Tower қурилиши ҳақида гапирди ва қўшнилар билан тинчликка тайёрлигини билдирди, деган Басс.
Трампнинг Яқин Шарқ давлатларига ташрифи билан таниш бўлган Reuters манбасига кўра, ҳақиқатан ҳам АҚШ ва Сурия вакиллари ўртасида учрашув режалаштирилмоқда. Бироқ Трамп ва аш-Шараъа ўртасида тўғридан тўғри музокаралар режалаштирилмаган. Сурия етакчисига яқин бўлган яна бир суҳбатдоши бундай учрашув бўлиши мумкинлигини истисно этмаган.
Башар Асад 2024 йил декабрь ойида ҳокимиятдан ағдарилган эди. Ҳокимиятни қўлдан бой бергач, Сурия ҳудудини тарк этди ва Россиядан сиёсий бошпана олди. Мамлакатда ўтиш даври ҳукумати тузилиб, қуролли мухолифатнинг собиқ етакчиси ва “Ҳайъат Таҳрир аш-Шом” гуруҳи раҳбари, Абу Муҳаммад ал-Жулоний номи билан ҳам танилган Аҳмад аш-Шараъа муваққат президент бўлди.
Изоҳ (0)