Россия йилига 113 та космик парвозни амалга ошириш орқали Хитойни ортда қолдирмоқчи. Мамлакат президенти Владимир Путин “Россия космик фаолиятини ривожлантириш” миллий лойиҳасини тасдиқлади. Бу ҳақда “Роскосмос” раҳбари Дмитрий Баканов маълум қилди.
Лойиҳани амалга ошириш учун давлат бюджетидан 4,5 триллион рубль ажратилади. Ҳужжатга кўра, 2030 йилга келиб Россия космик парвозлар сонини деярли 4 бараварга, 2036 йилга келиб эса 6,6 бараварга ошириши режалаштирилган. 2024 йилда “Роскосмос” атиги 17 та парвозни амалга оширган. Бу — Россия учун 1960 йиллардан бери энг паст кўрсаткич ҳисобланади.
Янги лойиҳа доирасида эса олти йилдан сўнг Россия ҳар йили 66 та сунъий йўлдош ёки аппарат учиришга эришиши керак бўлади. Бу 2024 йили 68 та учиришни амалга оширган Хитой даражасига тенглашади.
Бакановнинг таъкидлашича, 2036 йилга келиб Россия йилига 113 та парвозни амалга ошириши лозим. Бу кўрсаткич Россия (ёки собиқ СССР) космонавтика тарихида энг юқори натижа бўлади. Солиштириш учун, СССР ўзининг энг фаол даври — 1980 йилларнинг бошида йилига 100 га яқин космик парвозни амалга оширган.
Бироқ шунга қарамай, “Роскосмос” 12 йилдан кейин ҳам АҚШ кўрсаткичларига яқинлаша олмайди. 2024 йилда Қўшма Штатлар 154 та космик парвозни амалга оширган.
Россия 2000 йилда космик учиришлар бўйича етакчи эди. Ўша пайтда “Роскосмос” йилига 30 дан ортиқ парвозни амалга оширган, АҚШда бу кўрсаткич 28 та, Европада 12 та, Хитойда эса атиги 5 тани ташкил қилган. Бироқ ўтган йилларда АҚШ учиришлар сонини 5,2 баробар, Хитой эса деярли 14 баробар оширди. Натижада Россия космик кучлар ичида учинчи ўринга тушиб қолди.
Украина билан уруш ва санкциялар натижасида “Роскосмос” деярли барча хорижий мижозларини йўқотди. 2024 йилда давлат корпорацияси раҳбари ўринбосари Андрей Елчаниновнинг айтишича, халқаро шартномаларнинг оммавий бекор қилиниши “Роскосмос”га 180 миллиард рубль зарар етказган. 2020–2023 йиллар оралиғида корпорация 100 миллиард рублдан ортиқ соф зарар кўрди ва 2023 йилда ўз бюджетини тўлдириш учун активларини сотишга мажбур бўлди.
Изоҳ (0)