АҚШ президенти Дональд Трамп ҲАМАСга Ғазода гаровга олинганларни озод қилиш бўйича янги талаб қўйди. Бу ҳақда BBC хабар берди.
Исроил маълумотларига кўра, Ғазода ҳали ҳам 59 киши гаровда ушлаб турилмоқда, уларнинг 24 нафари тирик бўлиши мумкин. Асирлар орасида АҚШ фуқаролари ҳам бор.
Бу АҚШ ҲАМАС билан тўғридан тўғри музокаралар бошлаганини тасдиқлаганидан бир неча соат ўтиб, эълон қилинди. Бу музокаралар америкалик гаровга олинганларни озод қилишда Исроилни четлаб ўтиши мумкин. Вашингтон шу пайтгача ҲАМАС билан бевосита алоқа қилишдан қочиб келган.
Трамп гаровга олинганлар озод этилмаса, бу ҲАМАСга қимматга тушишини айтган. Исроилга эса қандай ёрдам кўрсатаётганини ҳақида изоҳ келтирмаган.
Танлов сизнинг қўлингизда. Барча гаровдагиларни ҳозироқ, кечиктирмасдан озод қилинг ва ўлдирилган одамларнинг жасадларини дарҳол қайтариб беринг, акс ҳолда сизга жуда ёмон бўлади. Мен Исроилга ишни якунлаш учун керак бўлган ҳамма нарсани юбормоқдаман.
Агар айтганимни қилмасангиз, ҲАМАСнинг бирорта аъзоси ҳам омон қолмайди. Мен ҳозиргина сиз ҳаётини издан чиқарган собиқ гаровдагилар билан учрашиб келдим. Бу сизга охирги огоҳлантириш! Раҳбарият учун энди Ғазони тарк этиш вақти келди, ҳали имкониятингиз бор. Ғазо халқига эса: сизни ажойиб келажак кутмоқда, лекин гаровдагиларни ушлаб турсангиз, бу сизга насиб этмайди, дея таҳдид қилди Трамп.
Бу Трампнинг ҲАМАСга илк таҳдиди эмас. У президент бўлганидан буён гаровга олинганларни озод қилишни таъкидлаб келади. Оқ уй матбуот котиби Каролин Левитт ҳам Трампнинг ҲАМАС билан гаровга олинганларнинг озод этилишини таъминлаш бўйича музокаралар олиб борганини тасдиқлаган.
Президент Трамп Америка халқи манфаатларини кўзлаб иш юритишни хоҳлайди. Гаровга олинганлар бўйича махсус вакил Адам Боэҳлернинг фаолияти ҳам Америка халқи учун, деди Левитт.
Axios берган маълумотларга кўра, томонлар Қатарда гаровга олинган АҚШ фуқароларини озод қилиш масаласида музокаралар олиб боришмоқда. Бу хабарни Оқ уй матбуот котиби ҳам тасдиқлаган.
АҚШ Мудофаа вазирининг Яқин Шарқ бўйича собиқ ўринбосари АҚШ ўз фуқароларини қайтаришда “фаолроқ бўлиши” кераклигини айтган. Адам Боэҳлер сўнгги ҳафталарда Қатар пойтахти Доҳада ҲАМАС вакиллари билан учрашган. ҲАМАСнинг Доҳада 2012 йилдан буён қароргоҳи мавжуд бўлиб, у Обама маъмурияти илтимосига кўра ташкил этилган.
Изоҳ (0)