АҚШ президенти Дональд Трамп Яқин Шарққа расмий сафарининг иккинчи кунида Қатар амири шайх Тамим бин Ҳамад Ол Соний билан 1,2 триллион долларлик иқтисодий битим имзолади. Томонлар минтақадаги вазиятни муҳокама қилди ва қатор келишувларга эришди. Бу ҳақда BBC хабар берди.
Амир бўлиб ўтган музокараларни “мазмунли” деб атади. У бундан буён Қатар ва АҚШ ўртасидаги муносабатлар янги босқичга кўтарилишига умид билдирди. Трамп эса суҳбатдошлар “бутун дунёни, жумладан, Россия, Украина ва Эронни муҳокама қилганини” айтди.
Трампнинг Қатар расмийлари билан учрашуви Саудия Арабистонига ташрифидан анча қисқа бўлди. АҚШ ва Қатар томонидан имзоланган ҳужжатлар орасида мудофаа соҳасидаги шартнома ва икки давлат ўртасидаги ҳамкорлик тўғрисидаги декларация бор.
Бундан ташқари араб давлати 200 миллиард доллардан ортиқ қийматга эга 160 та Boeing самолёти ва MQ-9B туридаги дронлар учун “рекорд даражадаги” буюртма берган.
Ҳужжатларни имзолаш маросимида АҚШ мудофаа вазири Пит Хегсет, молия вазири Скотт Бессент, савдо вазири Говард Лютник ва Оқ уй матбуот котиби Каролин Ливитт ҳам иштирок этди. Имзоланган келишувлар мамлакатлар ўртасида камида 1,2 триллион долларлик иқтисодий алмашинувни назарда тутади, тузилган битимлар ҳажми эса 243 миллиард доллардан ошади.
Қатар амири Тамим ибн Ҳамад Ол Соний музокарани бошлашдан олдин Трампни “дунё одами” деб атаган. Бунга жавобан АҚШ президенти амир билан узоқ вақтдан бери ҳамкорликда ишлаб келаётганларини айтган.
Бизга бошқа минтақаларда, хусусан, Россия ва Украина ўртасидаги вазиятда кўп ёрдам бераётганингизни биламан, деган Трамп.
Қатар ҳукумати Россияга олиб кетилган украиналик болаларни қайтариш масаласида можаро томонлари билан музокара олиб бормоқда.
Трампнинг таъкидлашича, Яқин Шарқ бўйлаб турнесининг асосий мақсадларидан бири АҚШга Форс кўрфазидаги бой мамлакатлар сармоясини жалб қилишдир. Аммо экспертлар унинг ташрифи президентнинг ўғиллари Эрик ва кичик Дональд бошчилигидаги Trump Organization томонидан эълон қилинган бир қатор ишбилармонлик битимларидан кейин содир бўлганига ҳам эътибор қаратмоқда.
Хусусан, компания май ойи бошида эълон қилган Trump Organization режаларига Қатар ва БААда голф майдонлари ва ҳашаматли виллалар қуриш киради. Апрель ойида эса компания “Дубай юрагида” 80 қаватли “жаҳон даражасидаги ҳашаматли турар жой”дан иборат минтақадаги биринчи Trump International Hotel & Тоwеr’ни қурмоқчи эканини эълон қилган.
Ҳозирда президент Трампнинг ўзи оилавий бизнесга алоқадор эмас. АҚШ президенти 20 январь кун бизнесини фарзандлари юритиши ҳақида маълумот берганди.
Изоҳ (0)