20 та араб ва ислом давлатлари ташқи ишлар вазирлари Исроилни ҳарбий ҳаракатларни тўхтатишга чақирди. Бу ҳақда Nur Kazakhstan хабар берди.
“Ташқи ишлар вазирлари минтақадаги хавфли кескинлашув бутун минтақа хавфсизлиги ва барқарорлиги учун жиддий оқибатларга олиб келиши мумкинлигидан чуқур хавотир билдиради. Улар Яқин Шарқда кескинлик кучайиб бораётган бир пайтда Исроилнинг Эронга қарши ҳарбий ҳаракатларини тўхтатиш зарурлигини ва ўт очишни тўхтатиш устида ишлаш муҳимлигини таъкидлайди”, дейилади қўшма баёнотда.
Вазирлар баёнотида, шунингдек, Халқаро атом энергияси агентлиги ва БМТ Хавфсизлик кенгашининг тегишли резолюцияларига мувофиқ, ядровий объектларга ҳужум қилишдан тийилишга чақирилган. Таъкидланишича, бундай ҳаракатлар халқаро гуманитар ҳуқуқнинг бузилиши ҳисобланади.
ОАВ маълумотларига кўра, Эрон олий раҳнамоси Али Хоманаий ва унинг оиласи 13 июнь кунидан бери Исроил ҳаво ҳужумларидан ерости бункерида бошпана топмоқда. Исроилнинг 15 июнь куни Машҳадга ҳаво ҳужуми Али Хоманаийга ядровий қурол дастурини қисқартириш бўйича “қарор қабул қилиш учун сўнгги имконият экани” ва Эрон раҳнамоси мамлакатнинг ҳеч қаерида хавфсиз эмаслиги” ҳақида огоҳлантириш бўлгани қайд этилган.
Аввалроқ Исроил бош вазири Биньямин Нетаньяху Эрон аҳолисининг 80 фоизи мамлакатнинг амалдаги раҳбариятини ағдаришни исташи, амалдаги ҳукумат эса “жуда заиф” эканини билдирганди. Бир кун аввал Нетаньяху Эрон олий раҳнамоси Али Хоманаийнинг ўлдирилиши можарони кучайтирмаслигини, балки унга чек қўйишини маълум қилганди. АҚШ президенти Дональд Трамп эса Хоманаийни ўлдирмасликка чақирганди.
Изоҳ (0)