Eronning 15-iyunga o‘tar kechasi Isroilga raketa zarbalari oqibatida Tel Aviv yaqinida turar joy binolari vayron bo‘ldi.
Ballistik raketa Tel Aviv chekkasidagi asosan rusiyzabonlar yashagan Bat Yam shaharchasida ko‘p qavatli turar joy binosiga kelib urilgan. Tarmoqlarda uyga zarba berilishi va zarbadan so‘ng vayronaga aylangani aks etgan videolar tarqaldi.
The Times of Israel yozishicha, bu zarbalar oqibatida kamida 6 kishi halok bo‘ldi, 100 dan ortiq kishi yaralangan, 3 kishi bedarak yo‘qolgan. Bat Yam meriga ko‘ra, ular vayronalar ostida bo‘lishi mumkin. Qutqaruv xizmati ma’lumotlariga ko‘ra, halok bo‘lganlarning 2 nafari 8 va 10 yoshdagi bolalar bo‘lgan.
Shaharchada 61 ta binoga zarar yetgan, ularning 6 tasi to‘liq buzilib tashlanishi kerak.
Isroil shimolidagi Tamra shahriga berilgan zarba oqibatida esa rasmiylarga ko‘ra, to‘rt kishi halok bo‘lgan. Tamra asosan arablar yashovchi shahar bo‘lib, Hayfadan, taxminan, 20 kilometr uzoqlikda joylashgan. Halok bo‘lganlarning barchasi musulmon bo‘lgan arab ayollaridir.
Mamlakatning markaziy qismidagi Rexovot shahrida Eron zarbasi oqibatida 40 kishi yaralandi.
Tungi hujumlarda jami 200 ga yaqin odam jarohatlangan.
Eron-Isroil mojarosi
13-iyunga o‘tar kechasi Isroil Eron yadro quroli yaratishga yaqinlashgani sababli yadroviy, harbiy obyektlar va yuqori martabali harbiylar joylashgan manzillarga hujum qildi. Zarbalar oqibatida Islom inqilobi qo‘riqchilari korpusining bir necha rahbarlari va eronlik fizik-yadroshunoslar halok bo‘ldi. Ular orasida Korpus qo‘mondoni Husayn Salamiy, Eron Qurolli kuchlari bosh shtabi boshlig‘i Muhammad Baqeriy, IIQK “Xotam al-Anbiyo” bo‘linmasi qo‘mondoni G‘ulom Ali Rashid, shuningdek, olimlar Faridun Abbosiy Davoniy va Ozod Muhammad Mahdiy Tehronchiy bor. Jami 78 kishi halok bo‘ldi, 320 dan ortiq kishi jarohat oldi.
Eron oliy rahbari Isroilning zarbalarini urush e’loni deb atadi. “Urushni ular boshlashdi. Biz ularning o‘sha yovuzligidan keyin omon qolishiga yo‘l qo‘ymaymiz”, dedi Ali Xomanaiy. O‘sha kuni kechqurun Islom inqilobi qo‘riqchilari korpusi Isroilga qarshi “Haqiqiy va’da-3” javob operatsiyasi boshlanganini e’lon qildi. Eron Isroilga uch marta raketa zarbalari berdi.
Isroil Tehrondan kelayotgan yadroviy tahdidga qarshi turish uchun Eron oliy rahnamosi Oyatulloh Ali Xomanaiyni ham o‘ldirishi mumkin.
Izoh (0)