Исроил бош вазири Биньямин Нетаньяху Вашингтонни Теҳрон билан можарога тортишга уринмоқда, бироқ АҚШ президенти Дональд Трамп маъмурияти бу масалада ҳали қарор қабул қилмаган. Бу ҳақда Австриянинг собиқ ташқи ишлар вазири Карин Кнайсл маълум қилди.
Унинг таъкидлашича, АҚШ учун қизил чизиқ Америка ҳарбий базасига ҳужум бўлиши мумкин.
“Ҳозирча Трамп ҳақиқатан ҳам урушга қўшиладими йўқми, билмаймиз. Билишимча, у ҳали бу ҳақда баёнот бермаган. Тушунишимча, АҚШ учун қизил чизиқ Америка ҳарбий базасига ҳужум бўлади. Лекин ҳозирча бундай воқеа содир бўлгани йўқ. Мен бу ҳақда яхши хабардорман”, деди Кнайсл.
Кнайслнинг айтишича, Нетаньяху сўнгги беш-олти кун ичида ўз мамлакатини “кескин қарама-қаршиликка” тортмоқда.
“Мен бошиданоқ гап фақат Эроннинг ядро дастури ҳақида эмас, балки режим ўзгариши ҳақида кетаётганини айтган эдим. Умид қиламанки, АҚШ ҳукумати бу урушга қўшилмайди, чунки бу Нетаньяхунинг тактикаси эди. Бу стратегия эмас, бу Қўшма Штатларни ушбу урушга жалб қилиш тактикаси эди”, дейди собиқ дипломат.
Бундан аввал ABC News телеканали Вашингтоннинг Исроилнинг Эронга қарши ҳарбий операциясига қўшилиши тўғрисидаги қарор яқин 24-48 соат ичида қабул қилиниши мумкинлигини хабар қилган эди. Исроил телевидениесининг 12-каналига кўра, яҳудий давлати расмий шахслари ҳам АҚШ Исроил операциясида иштирок этишга яқин, деб ҳисоблашмоқда.
Вермонт штати сенатори Берни Сандерс Исроил бош вазири Биньямин Нетаньяхуни АҚШ ва Эрон ўртасидаги ядровий келишув бўйича музокараларни барбод қилганликда айблаганди.
Исроил 13 июнга ўтар кечаси Эроннинг ядро дастурига қарши “Исёнкор шер” операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)