Newsweek нашри АҚШ, Хитой ва Россия ўртасида яқин келажакда дунёнинг тахминий бўлиб олиниши тасвирланган харитани эълон қилди.
Муаллифларнинг фикрича, Россиянинг таъсир доирасига бутун Европа, шу жумладан, Туркия ва Кавказорти республикалари кириши мумкин. Хитой эса Жануби-Шарқий Осиё, Япония, Ҳиндистон ва Покистон устидан назорат ўрнатишга интилади. АҚШнинг таъсир ҳудудига эса Шимолий Америка ва Гренландия киритилган.
Харитада Марказий Осиё, Яқин Шарқ мамлакатлари, Африка, Жанубий Америка ва Австралия ҳеч бир давлатнинг таъсир доирасига тушмаган — бу ҳудудлар “бўлинмаган зоналар” сифатида кўрсатилган. Мақолада Европа кенгашининг халқаро муносабатлар бўйича директори ўринбосари Весела Черневанинг фикрлари келтирилган.
У Украинадаги урушни тўхтатиш жараёнини 1945 йилда бўлиб ўтган Ялта конференцияси билан қиёслаган. Ўшанда Европа Совуқ уруш арафасида ҳудудларга бўлинган эди.
Англиянинг Бирмингем университети халқаро хавфсизлик профессори Стефан Волф эса қуйидаги фикрларни билдирмоқда.
Биз, эҳтимол, Хитой ва АҚШнинг ер шарини қандай бўлишини кузатамиз. Россия билан нима бўлиши, мустақил ўйинчига айланиши ёки Хитойга янада кўпроқ боғлиқ қолиши ҳали номаълум, дея таъкидлайди профессор.
Newsweek нашрига кўра, Марказий Осиё Россия ва Хитой ўртасидаги геосиёсий рақобат зонасига айланиши эҳтимолдан холи эмас. Трамп Ғарбий яримшарга эътибор қаратмоқда, бироқ у Хитойнинг, хусусан, Лотин Америкасидаги таъсирига дуч келиши мумкин.
Волфнинг фикрича, агар Москва АҚШ билан Украинадаги уруш юзасидан муросага эриша олмаса, унинг Пекинга қарамлиги кучаяди. Шунингдек, Трампнинг Хитой билан савдо урушини кучайтириши натижасида Си Цзиньпин ўз иқтисодий манфаатларини Европага йўналтириши мумкин. Бу эса Россияни заифлаштириши мумкин.
Изоҳ (0)