Россия президентининг халқаро масалалар бўйича ёрдамчиси Юрий Ушаков Вашингтон томонидан таклиф этилган 30 кунлик ўт очишни тўхтатиш "Украина ҳарбийлари учун вақтинчалик нафас олиш имконияти" эканлигини билдирди. Бу ҳақда у "Россия-1" телеканали эфирида маълум қилди.
Ушаковнинг таъкидлашича, Москва сулҳдан кўра узоқ муддатли ечимдан манфаатдор.
"Бизнинг мақсадимиз узоқ муддатли тинч йўл билан ҳал этишдир. Биз бунинг учун мамлакатимизнинг қонуний манфаатларини ва маълум хавотирларимизни ҳисобга олган ҳолда тинч ечимга эришишга интиламиз. Тинчлик ҳаракатларига тақлид қилувчи юзаки қадамлар, менимча, ҳозирги вазиятда ҳеч кимга керак эмас," деди Ушаков.
У АҚШ миллий хавфсизлик бўйича маслаҳатчиси Майк Уолтс билан суҳбатда Россия нуқтайи назарини билдирганини таъкидлади.
"Мен, табиийки, вақтинчалик сулҳ бўйича эришилган келишувларга изоҳ бердим ва бу Украина ҳарбийлари учун оддий танаффусдан бошқа нарса эмаслигини, ундан ортиқ ҳеч нарса эмаслигини айтдим," деди Россия президенти ёрдамчиси.
Ушаковнинг қўшимча қилишича, Владимир Путин 13 март куни Украинада вақтинчалик ўт очишни тўхтатиш режимини жорий этиш таклифига "аниқроқ ва мазмунлироқ баҳо" бериши мумкин.
Интервью давомида у АҚШ келгусида ушбу масала юзасидан ҳамкорликда иш олиб боришда Россиянинг позициясини инобатга олишига умид билдирган. Шунингдек, унинг сўзларига кўра, Дональд Трамп маъмурияти "Украинанинг НАТОга аъзо бўлиши ҳақида гап бўлиши мумкин эмаслигини" англайди.
АҚШ ҳукумати 11 март куни Украина билан ўтказилган музокараларда бутун фронт чизиғи бўйлаб 30 кунлик ўт очишни тўхтатишни таклиф қилди. Украина бу таклифни қўллаб-қувватлади.
13 март куни Дональд Трампнинг Яқин Шарқ бўйича махсус элчиси Стив Уиткофф Москвага ташриф буюрди. Унинг ташрифи ҳақида Оқ уй бир кун олдин эълон қилган эди. У ким билан музокара олиб бориши аниқ эмас эди. Оммавий ахборот воситалари унинг Россия президенти Владимир Путин билан эҳтимолий учрашуви ҳақида хабар берган. Юрий Ушаков ташриф тафсилотлари ҳақида изоҳ беришдан тийилган.
Изоҳ (0)