Малайзия Ўзбекистон олий таълим муассасалари учун инглиз тилидаги илмий адабиётларни беғараз тақдим қилди, деб хабар бермоқда “Дунё” АА хабар берди.

Унга кўра, Малайзиянинг етакчи олий таълим муассасалари Ўзбекистонга қиймати 20 минг АҚШ долларга тенг бўлган инглиз тилидаги ўқув ва илмий адабиётлар кўринишидаги техник кўмакни тақдим этди.

Ўзбекистон элчихонаси ва Малайзиянинг МАРА Технология университети ўртасида ўтказилган музокаралар натижасида эришилган келишувга мувофиқ, 500 га яқин, жумладан, муҳандислик, тиббиёт, молия-иқтисод, кимё-биология, математика ва компьютер технологиялари каби йўналишларга оид инглиз тилидаги адабиётлар Uzbekistan Airways авиакомпанияси кўмагида Ўзбекистонга юборилди.

Ўзбекистон Малайзия ҳамкорлиги

Ўзбекистон Малайзия билан жиноий ишлар бўйича ҳуқуқий ҳамкорлик қилади. 

Шавкат Мирзиёев Малайзия бош вазири Анвар Иброҳимнинг таклифига биноан 4 февраль куни кечқурун расмий ташриф билан ушбу мамлакатга борганди. Президент аэропортда Малайзия парламенти спикери билан учрашув ўтказган. Бўлажак олий даражадаги учрашувлар кун тартиби юзасидан фикр алмашилган. 

Ташқи савдо

Йил бошидан буён Ўзбекистон ва Малайзия ўртасида ташқи савдо айланмаси 36 фоизга ошиб, салкам 20 млн АҚШ долларини ташкил қилди. Ўзбекистондан Малайзияга асосан мева-сабзавот, минерал ўғитлар экспорт қилинган бўлса, ушбу давлатдан Ўзбекистонга ўсимлик ёғилари, қаҳва, чой ва зираворлар, кимё саноати ва озиқ-овқат маҳсулотлари импорт қилинган.

Дронлар ишлаб чиқаришда ҳамкорлик

Куни кеча Ўзбекистон ва Малайзия ақлли қишлоқ хўжалиги технологиялари ва дронлар ишлаб чиқаришда амалий ҳамкорлик қилишга келишган эди. 

Малайзия компаниялари Ўзбекистонда дронлар ишлаб чиқаришга қизиқиш билдираётгани ҳақида 2023 йилнинг апрелида маълум қилинганди. 2024 сентябрида Малайзиянинг етакчи робототехника етказиб берувчиси Meraque Group компанияси ва Ўзбекистон Қишлоқ хўжалиги вазирлиги ўртасида ўзаро англашув меморандуми имзоланганди.

Ушбу компания келгуси уч йил ичида Ўзбекистонда мингта иш ўрни яратадиган ва 100 минг гектар қишлоқ хўжалигига хизмат кўрсатадиган ишлаб чиқариш корхонасини ташкил этиш учун 20 миллион Малайзия ринггити сармоя киритмоқчи. Компания, шунингдек, минтақадаги технологик такомиллаштириш учун қўшимча 30 миллион ринггит йиғмоқчи.

2018 йилда ташкил топган Meraque компанияси кенг турдаги дронлар ва улар учун дастурий таъминот ишлаб чиқариш, робототехникага ихтисослашган. Компания Вьетнам, Камбоджа, Филиппин, Лаос ва Покистонда фаолият юритади.