Буюк Британия бош вазири Кир Стармер Украинага 10 мингдан ортиқ Ғарб тинчликпарвар кучларини юбориш режалаштирилганини айтди. У Европа иттифоқи давлатлари етакчилари ва НАТО вакилларининг онлайн конференциясида бу ҳақда маълумот берди.
Стармернинг сўзларига кўра, аввалроқ қўшин юборишга рози бўлган учта давлатдан “анча кўпроқ” давлатнинг қўллаб-қувватлашига эришилган. Кучларнинг асосий қисми Буюк Британия ва Франция томонидан тақдим этилиши эҳтимоли юқори. Жами 35 га яқин давлат Россияни “тийиб турувчи куч”га айлантириш миссияси доирасида қурол-яроғ етказиб бериш, логистика ва разведкада иштирок этиш мажбуриятини олган.
Учрашув иштирокчиларининг фикрича, бу “Россия ва Украина ўртасида ўт очиш тўхтатилган тақдирда” Кремлни янги босқинни бошлашдан сақлаб қолиши мумкин. Стармернинг ўзи кўп миллатли тинчликпарвар кучларни яратиш режалари “оператив босқичга” ўтаётганини айтди.
Макрон: Европа иттифоқи қўшинларини жойлаштириш қарори фақат Украинага боғлиқ
Европа Иттифоқи давлатлари украинага аскар юбориш масаласини Москванинг фикрига эмас, балки тўғридан-тўғри Киев билан муҳокама қилади. Франция президенти Эммануэл Макрон шундай баёнот берган.
Париж ва Лондон илгари сураётган ташаббус доирасида Европа Иттифоқи мамлакатлари Киев, Одесса ва Лвовдаги йиғилиш марказларига бир неча минг аскар юбориши мумкин, деб хабар берди Le Parisien газетаси.
Шу билан бирга, Европа етакчилари бу масала бўйича Москванинг фикрига таянмоқчи эмас.
Украина суверен. Агар у ўз ҳудудида иттифоқчи қўшинларни жойлаштиришни сўраса, буни қабул қилиш ёки қилмаслик — Россиянинг иши эмас, деган Макрон.
Буюк Британия бош вазири Россия президенти Владимир Путин АҚШ президентининг махсус вакили Стив Уиткофф томонидан берилган АҚШнинг ўт очишни тўхтатиш таклифини эътиборсиз қолдирганини таъкидлади. Стармернинг сўзларига кўра, Путин ўт очишни тўхтатиш билан “ўйин ўйнамоқда”, аммо “тинчликка тайёр эмас”.
Изоҳ (0)