Ҳиндистон хавфсизлик кучлари чегарани ноқонуний кесиб ўтишга уринган Покистон фуқаросини отиб ўлдирди. Бу ҳақда AFP агентлигига таяниб DW хабар қилди.
Ҳиндистоннинг Чегара хавфсизлик кучлари (BSF) берган баёнотга кўра, воқеа Гужарот штатида юз берган. 23 май, жума куни кечқурун чегара бўйича патруллик қилаётган ҳарбийлар “шубҳали шахс”ни кўрган ва уни тўхташга чақирган. Аммо у бу буйруқни эътиборсиз қолдириб, югуришда давом этган. Шундан сўнг ҳарбийлар унга қарата ўқ узганини маълум қилишган.
Ҳиндистон ва Покистон ўртасидаги зиддият
Икки давлат ўртасидаги муносабатлар 22 апрель куни Кашмирнинг Паҳалгам ҳудудида юз берган террорчилик ҳужуми сабаб кескинлашди. Ҳужум оқибатида 26 киши ҳалок бўлди. Қуролли шахслар маҳаллий аҳоли ва сайёҳларга қарата ўт очди. Ҳиндистон Покистонни бу ҳужумни қўллаб-қувватлашда айблади. Покистон мазкур даъвони рад этиб, текширув ўтказишни талаб қилди.
Ҳиндистон Покистон билан 1960 йилдаги Ҳинд сувлар тўғрисидаги шартномани тўхтатиб, чегара бўйлаб сув оқимини тўхтатиб қўйди. Покистон бу уруш очишга тенг эканини билдирди. Мамлакат Ҳиндистон билан дипломатик ва савдо алоқаларини чеклади, ҳаво майдонини ёпди ва савдо алоқаларини тўхтатди.
Чегара бўйлаб кичик қуролли тўқнашувлар ва ракета синовлари кўпайди. Покистон қисқа масофали Фатаҳ ракетасини синовдан ўтказди, Ҳиндистон эса хавфсизлик машғулотларини кучайтирди Халқаро ҳамжамият, жумладан Қўшма Штатлар, томонларни зиддиятни эскалация қилмасликка чақириб, дипломатик каналларни тиклашга чақирганди.
Ҳиндистон ва Покистон 10 май куни соат 17:00 дан бошлаб қуруқликда, ҳавода ва денгизда барча отишмалар ва ҳарбий ҳаракатларни тўхтатишга келишиб олди. Бир неча соат ўтгач, томонлар бир-бирини ўт очишда айблади. АҚШ воситачилигида ядро қуролига эга қўшнилар ўртасида келишилган ўт очишни тўхтатиш тартиби ҳозирча сақланиб қолган.
Изоҳ (0)