Ўзбекистон ва Хитой ўртасида ўзаро визадан озод қилиш тўғрисидаги ҳукуматлараро битим кучга кириши учун давлат ички процедуралари тугалланди. Бу ҳақда Ташқи ишлар вазирлиги матбуот хизмати хабар берди.
Маълум қилинишича, кўрсатилган халқаро шартноманинг қоидаларига биноан, битим 2025 йил 1 июндан эътиборан кучга киради.
Битим Ўзбекистон ва Хитой фуқароларининг икки давлат ҳудудига ўзаро визасиз сафарларига доир масалаларни тартибга солади.
Битимга мувофиқ, томонлар давлатлари фуқаролари икки давлат ҳудудларига кириш, ундан чиқиш ёки транзит қилиш учун ҳар бир алоҳида бўлиш муддати 30 кундан ошмайдиган муддатда ва ҳар қандай 180 кунлик давр ичида жами 90 кундан ортиқ бўлмаган муддатда виза талабларидан озод қилинади.
Бунда томонларнинг давлатлари ҳудудига ҳар бир кириш ва бўлиш муддати 30 кундан ошмаслиги лозим.
Агар фуқаролар 30 кундан ортиқ қолишлари керак бўлса, улар кириш визасини олдиндан олишлари лозим.
Визасиз режим меҳнат фаолияти, ўқиш ва медиа фаолияти билан шуғулланиш, шунингдек, бошқа Томон ваколатли органларининг олдиндан розилигини талаб қиладиган бошқа турдаги фаолият билан шуғулланишга нисбатан татбиқ этилмайди.
Кўрсатилган битим ХХРнинг Гонгконг ва Макао махсус маъмурий ҳудудларига ташриф буюришга нисбатан амал қилмайди.
Хитойга визасиз бориш
2023 йилнинг октябрида Хитойнинг Ўзбекистондаги элчихонаси томонидан ўтказилган брифингда Ўзбекистон—Хитой ўртасида визасиз режим жорий қилиниши мумкинлиги айтилганди. Тадбирда Хитойнинг Ўзбекистондаги элчиси Юй Сзюн визасиз режимни жорий этиш бўйича Хитой ҳукуматида кучли хоҳиш борлигини таъкидлаганди.
“Лекин бу масалаларни мутахассислар орқали муҳокама қилиш ва келишиш керак. Ҳозир Хитой тарафи бу масалани диққат билан ўрганмоқда. Дастлаб виза олиш тартиби енгиллаштирилади, кейинроқ бошқа масалаларни кўриб чиқишга тайёрмиз”, деган эди элчи.
Шунингдек, у Ўзбекистон Хитой фуқаролари учун 10 кунлик визасиз режим жорий қилганлигидан миннатдорлигини билдирганди. Хитой фуқаролари учун ўн кунлик визасиз режим 2021 йил март ойидан буён амалда.
2024 йил ноябридан Хитой яна 9 та давлат — Словакия, Норвегия, Финляндия, Дания, Исландия, Андорра, Монако, Лихтенштейн ва Жанубий Корея билан визасиз режим жорий қилганди.
Йил бошидан буён у Европанинг 11 давлати, жумладан, Австрия, Германия, Франция, Ирландия, Нидерландия, Италия ва Швейцария, шунингдек, Малайзия фуқароларига ҳам татбиқ этилди. Июнь ойи охирида рўйхатга Польша, Австралия ва Янги Зеландия қўшилди. Дастур шартларига кўра, унга киритилган барча давлат фуқаролари Хитойга ўзларининг оддий паспортлари билан кириб, мамлакатда 15 кунгача визасиз қолишлари мумкин.
Хитойда яна бир визасиз кириш дастури мавжуд бўлиб, ундан 54 давлат, жумладан АҚШ, Канада ва Буюк Британия фуқаролари фойдаланиши мумкин. Ушбу мамлакатлар фуқаролари Хитойга 37 пунктдан бири орқали кириб, учинчи давлатга саёҳат қилиш учун чиптага эга бўлса, мамлакатда 72 ёки 144 соат давомида визасиз қолиш имкониятига эга.
Изоҳ (0)