Ўзбекистон кичик қувватли АЭС қурилиши учун ҳудудни тасдиқлади, деб хабар бермоқда “Узатом” агентлиги.
Маълум қилинишича, 6 май куни Энергетика хавфсизлиги масалалари бўйича президент маслаҳатчиси Алишер Султонов раислигида кичик қувватли атом электр станцияси (АЭС) қурилиши лойиҳасини амалга оширишга бағишланган оператив штаб ва илмий-техник кенгашнинг қўшма йиғилиши бўлиб ўтди.
Йиғилиш давомида лойиҳа доирасидаги асосий йўналишлар, жумладан, техник, ташкилий ва инфратузилмавий масалалар муҳокама қилинди. “Атомстроекспорт” АЖ билан тузилган шартнома асосида олиб борилаётган ишларнинг жорий ҳолатини ёритувчи тақдимот намойиш этилди. Унда лойиҳалаш босқичлари, тайёргарлик ишлари ва халқаро ҳамкорлик борасидаги натижалар кўриб чиқилди.
Муҳокамалар чоғида қурилиш-монтаж базасини ташкил этиш, ер бўлимларини ажратиш, ташқи инфратузилмани таъминлаш каби масалалар юзасидан маҳаллий ҳокимиятлар ва пудрат ташкилотлари билан яқин ҳамкорлик зарурлиги таъкидланди.
Илмий-техник кенгаш томонидан лойиҳа жойлашадиган майдон — Жиззах вилояти Фориш тумани расман тасдиқланди. Бу танлов минтақавий энергетика эҳтиёжларини ҳисобга олган ҳолда электр энергияси ишлаб чиқаришни оптималлаштириш имконини беради.
Шунингдек, йиғилишда Ўзбекистоннинг табиий уран ресурсларидан фойдаланиш орқали ядро ёқилғиси ишлаб чиқариш истиқболлари муҳокама қилинди. Бу эса лойиҳа иқтисодий самарадорлигини ошириш ҳамда мамлакатнинг энергетик мустақиллигини мустаҳкамлашга хизмат қилади.
Лойиҳа доирасида юқори сифатли ва халқаро стандартларга мос ҳужжатларни тайёрлаш мақсадида мунтазам ишчи йиғилишлар ўтказилмоқда. Муҳандислик тадқиқотлари, сейсмик мониторинг, гидрологик ва бошқа табиий муҳит бўйича кузатувлар давом этмоқда.
Йиғилиш якунида барча иштирокчилар кичик қувватли атом электр станцияси қурилиши лойиҳасини муваффақиятли амалга оширишга тўлиқ тайёр эканликларини билдирган ҳолда, белгиланган вазифаларни изчил давом эттиришга келишиб олди.
АЭС энергия мустақиллигини таъминлашда янги имконият
Маълумотларга кўра, дунёда биринчи бўлиб Россияда 1954 йилда қуввати 6 МВт бўлган АЭС ишга туширилган. Орадан 70 йилдан ортиқ вақт ўтиб, АЭС имкониятларидан фойдаланадиган мамлакатлар сони анчага кўпайди.
Бугунга келиб дунёнинг 32 та мамлакатида умумий қуввати жами 377 ГВт бўлган 417 та атом реакторлари фаолиятини давом эттирмоқда. Шунингдек, 61 та атом реакторлари қурилиш жараёнида.
АЭС қурган ва улардан тўлиқ фойдаланаётган мамлакатлар рўйхатига Япония, Жанубий Африка, Жанубий Корея, Швеция, Швейцария, Франция, Туркия, АҚШ, Россия, Покистон, Эрон, Хитой, Ҳиндистон, Германия, Англия, Беларусь ва бошқа давлатлар киради. Айнан шу давлатлар қурилган АЭС ҳисобига ўзларининг энергия мустақиллигини таъминлаган ҳамда иқтисодий ўсишда сезиларли натижаларга эришган.
Сўнгги йилларда Ўзбекистон ҳам кўплаб ривожланган мамлакатлар қатори замонавий АЭС қуриш борасида бир қанча лойиҳаларни бошлаган эди. Куни кеча давлат раҳбарига мазкур масалага дахлдор бўлган масъуллар томонидан республикада атом энергетикасини ривожлантиришга қаратилган вазифалар ижроси юзасидан ахборот берилди.
АЭСда ишлаб чиқарилган электр энергияси нархи анъанавий энергия ресурсларига (газ, кўмир, мазут) нисбатан барқарор, арзон, экологик тоза электр манбаи ҳисобланади.
Шу билан бирга АЭСларнинг углеводородли ёқилғи қўлланиладиган анъанавий электр станцияларига нисбатан яна бир афзаллиги кам ҳажмдаги ёқилғи сарф қилган ҳолда улкан миқдорда энергия ишлаб чиқариш хусусиятига эга экани.
Атом электр станцияларини қуриш истиқболли лойиҳа бўлиб, келажак авлод учун энергия хавфсизлигини таъминлашда муҳим замин яратади.
Изоҳ (0)