Европа комиссияси президенти Урсула фон дер Ляйен бу ҳафта Россиянинг Украинага қарши урушини тўхтатиш учун “ҳал қилувчи” бўлишини айтди.
Сиёсатчи 18 май куни АҚШ вице-президенти Жей Ди Венс билан Римдаги музокаралар чоғида шундай фикр билдирди.
Бизни бирлаштирадиган нарса шундаки, биз Украина учун адолатли ва мустаҳкам тинчликни хоҳлаймиз. Сиз (АҚШ) урушни тўхтатишга қанчалик содиқ эканини биламиз ва бунинг учун сизга миннатдорлик билдираман. Ҳозир, албатта, олдинга силжишимиз муҳим ва ўйлайманки, кейинги ҳафта (шу ҳафта назарда тутилмоқда) бу борада ҳал қилувчи аҳамиятга эга бўлади.
Европанинг аъзо давлатлари мудофаага сармоя киритишни кучайтириш кераклигини билишади. Айнан шунинг учун Комиссия сифатида биз келгуси тўрт йил ичида мудофаа инвестициялари учун 800 миллиард еврогача маблағдан фойдаланишга рухсат бердик. Бу, албатта, Европа Иттифоқини мустаҳкамлайди, кучли Европа ҳар доим кучли НАТОни англатади, деди Ляйен.
Венс эса Европа Иттифоқи “савдо каби масалалар бўйича баъзи келишмовчиликларга қарамай”, АҚШнинг муҳим иттифоқчиси эканини таъкидлади.
Лекин бизда биргаликда ишлашимиз керак бўлган кўплаб келишувлар ва масалалар ҳам бор, деди АҚШ вице-президенти.
АҚШ президенти Дональд Трамп 19 май куни Россия раҳбари Владимир Путин ва Украина президенти Владимир Зеленскийга қўнғироқ қилиши кутилмоқда. У Путин билан урушни тўхтатиш ва савдони муҳокама қилишини айтган. Россия ва Украинанинг тўғридан-тўғри музокаралари 16 май куни бўлиб ўтганди, гарчи дастлаб 15 майга режалаштирилган бўлса-да. Уларни қайта тиклаш ташаббуси билан Путин чиққан.
Россия президентининг бу учрашувда иштирок этиши Кремлда истисно қилинган. Зеленский 15 май куни Анқарага учиб келган, Туркия етакчиси Ражаб Тоййиб Эрдўғон билан музокаралар ўтказди ва Украина делегациясини Истанбулга юборди.
Унинг ўзи Альбанияга учиб кетди ва у ерда Франция президенти Эммануэл Макрон, Буюк Британия ва Польша бош вазирлари Кир Стармер ва Дональд Туск, шунингдек, Германия канцлери Фридрих Мерс билан учрашди. Европа етакчилари ҳам Трампга қўнғироқ қилишди. Стармернинг аниқлик киритишича, суҳбатдан мақсад Россия “яна бир бор” намойиш этган “қабул қилиб бўлмайдиган позиция”га биргаликда жавоб бериш эди.
Изоҳ (0)