Туркия президенти Ражаб Тоййиб Эрдўғон G20 саммитида Украинадаги можарони ҳозирги фронт чизиғида музлатиб қўйишни таклиф қилади. Бу ҳақда манбаларга таяниб, Bloomberg хабар берди.
Манбаларнинг таъкидлашича, Эрдўғон ўз ташаббусини бугун, 18 ноябрь куни бўлиб ўтадиган давлатлар раҳбарлари учрашувида тақдим этади. Туркиянинг таклифи Донбассда қуролсизлантирилган ҳудуд яратиш ва Украинанинг НАТОга киришини кечиктиришни ўз ичига олиши мумкин. Бунинг эвазига Туркия раҳбари Украинага хавфсизлик кафолатлари ва ҳарбий таъминотни давом эттиришни таклиф қилиши кутилмоқда.
Туркия президенти ҳарбий можаро муҳокамасига қўшилган НАТОга аъзо мамлакатнинг сўнгги раҳбари бўлди. АҚШ президенти Дональд Трамп январда Оқ уйга қайтиб, урушни 24 соаг ичида тугатишга ваъда бермоқда. Германия канцлери Олаф Шольц 14 ноябрь куни телефон орқали суҳбатда Россия президенти Владимир Путинни тинчлик музокараларини бошлашга чақирган. Франция президенти Эммануэл Макрон 17 ноябрь куйни куни вақти келганда Россия раҳбари билан гаплашишини айтган.
Эрдўғон Зеленскийни Истанбулдаги тинчлик музокараларида қатнашишга кўндира олишига умид қилмоқда. Чунки жанглар тўхтатилмаса, Украина кейинги бир неча ой ичида янада кўпроқ ҳудудини йўқотиши мумкин, дейилади хабарда. Бироқ, жанг майдонидаги вазият Путинга ҳам курашни давом эттириш учун рағбат бермоқда.
Путин нима дейишидан қатъи назар, у тинчликни истамайди ва музокараларга тайёр эмас. Путиннинг мақсади жангни кучайтириш, буни биз бир неча ҳафтадан бери кўриб келмоқдамиз, деган Франция президенти Буэнос-Айрес аэропортида.
G20 саммити 18-19 ноябрь кунлари Рио-де-Жанейрода ўтказилади, унда Россия ташқи ишлар вазири Сергей Лавров иштирок этади. Лавровга кўра, Украина можаросини тўқнашув чизиғи бўйича музлатиш имконияти — “янги қадоқдаги ўша Минск келишувлари”дир. The Wall Street Journal газетаси хабар беришича, жангларни тугатишнинг бундай вариантини 2025 йил январда лавозимга кирадиган АҚШнинг сайланган президенти Дональд Трамп жамоаси ҳам кўриб чиқмоқда.
Украинадаги уруш бўйича аввалги музокаралар ва шартлар
Россия ва Украина ўртасида 2022 йил 17 март, 15 апрель ва 29 март куни Истанбулда музокаралар бўлиб ўтганди. Москва Қримни Россиянинг бир қисми сифатида тан олишни, Россияга қарши барча санкцияларни бекор қилишни, барча суд даъволарини тўхтатишни, мамлакат Халқаро жиноий судга тортилмаслиги бўйича талабларни илгари сурган. Украина томони уларни муҳокама қилишдан бош тортган.
Киев Россиянинг ҳарбий иттифоқларга, авваламбор НАТОга қўшилмаслик бўйича талабини бажаришга тайёр бўлган, бунинг эвазига Россия Украинанинг Евроиттифоққа киришига қаршилик қилмаган.
Украина эса ҳудудий яхлитликни таъминлаш, ҳарбий ҳужумларни тўхтатиб, кучларни олиб чиқиш, Қримнинг мақомини муҳокама қилиш, инфратузилмани тиклаш талабини илгари сурган. Президент Владимир Зеленский Россиянинг талабларини “ишониб бўлмайдиган ультиматум” деб баҳолаган. Украина томони можарони 1991 йилги чегараларга қайтиш билан якунланиши кераклигини таъкидлаган.
Изоҳ (0)