Bloomberg: Евроиттифоқ етакчилари Путин билан учрашишдан бош тортди

Брюсселдаги саммитда Европа Иттифоқи мамлакатлари етакчилари Германия ва Франциянинг Россия президенти Владимир Путин билан расмий музокаралар ўтказиш таклифини рад этди. Бу ҳақда вазиятдан хабардор европалик дипломатларга таяниб, Bloomberg хабар берди.

Маълум бўлишича, Германия канцлери Ангела Меркель ва Франция президенти Эммануэль Макроннинг таклифи узоқ давом этган музокаралардан сўнг Европа Иттифоқи саммитининг якуний коммюникесидан чиқариб ташланган.

Таъкидланишича, баъзи Шарқий Европа давлатлари мунозара давомида ушбу ҳужжатга вето қўйишга тайёр экани ҳақида огоҳлантирган. Бошқа бир маълумотга кўра, Европа Иттифоқининг ўнга яқин давлати бу ғоянинг ўзи ҳам, унинг сўнгги дақиқада пайдо бўлгани ҳам уларга ёқмаганини ошкора билдирган.

Меркель журналистларга Иттифоқ мамлакатлари раҳбарларидан «дадилроқ қадам» кутгани ҳақида айтган. «Россия билан музокаралар учун формат ва шартлар ишлаб чиқилади. Аммо раҳбарлар даражасида эмас», — деди у.

Bloomberg хабарига кўра, Европа комиссияси раҳбари Урсула фон дер Ляйен ва Европа кенгаши раҳбари Шарл Мишелнинг Россия раҳбари билан учрашув ўтказиши — муросавий таклифлардан бири бўлди.

Айни пайтда, Литва президенти Гитанас Науседа Европа Иттифоқи саммитининг биринчи куни якунлари бўйича Европа Кенгаши Россия билан мулоқот қилиш учун тегишли формат ва шартларни белгилашини айтди. Науседа Франция ва Германиянинг Путинни Иттифоқ саммитларидан бирига таклиф қилиш ғоясига қарши эканини таъкидлади.

Аввалроқ Financial Times манбаларига асосланиб, Меркель Путинни Европа Иттифоқи саммитига таклиф қилиш ғоясини билдиргани, уни Макрон қўллаб-қувватлагани ҳақида хабар берган эди. Газетанинг ёзишича, Берлин Женевада ўтказилган Россия—АҚШ саммити Россия билан муносабатларни қайта тиклаш мумкинлигидан далолат беради, деган хулосага келган.

Европа Иттифоқининг саммити 24 июнь куни бошланди. Бошқа масалалар қатори, Иттифоқ мамлакатлари президентлари ва ҳукумат раҳбарлари Россия билан муносабатларга умумий ёндашув мавзусини муҳокама қилмоқда.